Aumentado: Ayuda siguradoha nga makaabot direkta sa labing naapektuhan – STATE OF CALAMITY

GIPAHINUMDOMAN ni Gobernador Aris Aumentado ang mga ahensya nga nagdumala sa pag-apod-apod sa ayuda aron masiguro nga kini direkta nga moabot sa mga labing nanginahanglan — ilabi na sa mga pamilya ug sektor nga grabeng naapektuhan sa epekto sa El Niño dinhi sa atong probinsya.

Partikular niyang gipasiguro ang DSWD ug ang Provincial Social Welfare and Development Office aron walay mabiyaan ug masiguro nga ang matang sa tabang moadto gyud sa mga tawo nga nagkinahanglan niini.

Kini nahitabo human ang tibuok probinsya opisyal nga gideklarar ubos sa State of Calamity tungod sa padayong hulaw nga dala sa El Niño. Sa pinakabag-o nga report, milapas na sa P300 milyon ang natala nga kadaot sa atong agrikultura, nga nakadaot sa libuan ka mga mag-uuma sa nagkalain-laing lungsod sa Bohol.

Ang maong deklarasyon gihimo aron mas dali ug mas hapsay nga magamit ang atong calamity fund alang sa mga programa ug tabang nga motubag sa tinuod nga panginahanglan sa mga komunidad nga labing naapektuhan sa hulaw.

Ang tumong mao ang masiguro nga ang atong mga kapanguhaan magamit sa saktong paagi ug moabot gyud sa mga tawo nga nagkinahanglan niini. (RTB)