- Nagtanyag og technical training ug oportunidad sa pagpanarbaho sa mga batan-on
VALENCIA, BOHOL – Gipahigayon niadtong Nobyembre 13, 2026, alas 10:00 sa buntag, sa Valencia Astrodome ang Career Orientation sa Dualtech Training Center, nga nagtumong sa pagpaila sa mga oportunidad sa teknikal nga edukasyon ug trabaho alang sa mga batan-on ug mga gustong makabaton og kahanas sa electrical, electronics ug mechanical technology.
Sa iyang welcome message, gipasiugda ni Valencia Municipal Mayor Engr. Dionisio Neil A. Balite, J.D., Ph.D. ang kahinungdanon sa paghatag og dugang oportunidad sa mga batan-on pinaagi sa teknikal nga edukasyon ug pagbansay nga direktang may kalabotan sa panginahanglan sa industriya.
Gipaila usab sa maong orientation ang Dualtech Training Center isip usa ka technical school nga nahimutang sa Carmelray Industrial Park 1, Canlubang, Calamba City, Laguna, nga nailhan isip unang institusyon sa Pilipinas nga nagtukod ug nagpatuman sa dual-training system diin ang mga estudyante magkat-on sa duha ka lugar — sa eskwelahan ug sa mismong kompanya.
Sukad sa pagkatukod niini niadtong 1982, nakig-alayon na ang Dualtech sa kapin 200 ka partner companies sa tibuok nasud ug nakahimo na og kapin 16,000 ka graduates nga nakaplagan og trabaho dinhi sa Pilipinas ug sa gawas sa nasud.
Usa sa mga programang gitanyag niini mao ang One-Year ug Two-Year Electromechanics Technology, nga nagpunting sa hands-on training sa electrical, electronics ug mechanical technologies. Ang mga trainees bansayon sa paghimo, pag-assemble, pagmentinar, pag-instalar ug pag-ayo sa nagkalain-laing production facilities nga gigamit sa mga kompanya.
Lakip sa sistema sa pagbansay ang unom ka bulan nga Basic Skills Training Program (BSTP) nga himoon sa Dualtech School, diin tudloan ang mga estudyante sa batakang kahibalo ug kahanas sa electrical, electronics ug mechanical works, lakip na ang character formation.
Human niini, mosunod ang Applied Stage Training Program (ASTP) nga molungtad og unom o 18 ka bulan, diin ang mga trainees ibutang sa mga partner companies aron magamit sa aktuwal nga trabaho ang ilang nakat-onan. Makadawat usab sila og binulang allowance nga katumbas sa 75 porsiyento sa minimum wage, depende sa lokasyon sa kompanya.
Human makompleto ang ilang training, adunay oportunidad ang mga graduates nga ma-hire sa kompanya diin sila nag-training o sa ubang partner companies sa Dualtech.
Gipatin-aw usab nga adlaw-adlaw abli ang enrollment sa Dualtech ug walay bayad ang enrollment ug reservation fee. Dili usab gikinahanglan nga mopalit ang mga trainees og mga materyales, tools, gadgets o proyekto alang sa ilang pagbansay.
Lakip sa mga kinahanglanon sa pag-enroll ang original copy sa high school card o Form 137-A o Transcript of Records, photocopy sa PSA Birth Certificate, diploma o proof of graduation, ug duha ka pirasong 2×2 o passport-size nga litrato nga adunay name tag.
Kinahanglan usab ang medical examination ug diagnostic examination nga naglangkob sa Basic Mathematics, Basic English, Abstract Reasoning ug Reading Comprehension. Ang aplikanteng dili makaabot sa minimum passing score nga 50 porsiyento kinahanglan mo-usab sa eksaminasyon.
Si Mr. Jordan Y. Rea, Head sa Community Relations, maoy nanguna sa Orientation Part I, nga gisundan sa Question and Answer Portion Part I.
Gipadayon ang orientation ni Mr. Rodolfo V. Sta. Ana III, Director for External Relations, pinaagi sa Orientation Part II, ug gisundan sa ikaduhang Question and Answer Portion.
Pinaagi niini nga kalihokan, gihatagan og higayon ang mga partisipante nga mas masabtan ang sistema sa edukasyon sa Dualtech, ang mga teknikal nga kurso nga gitanyag, mga kinahanglanon sa pag-admit, ug ang mga oportunidad sa trabaho nga mahimong maangkon human sa training.
Gilauman nga pinaagi sa maong career orientation, mas daghang batan-on sa Valencia ang makaila sa alternatibong dalan sa pag-eskwela ug pag-andam sa kaugalingon alang sa umaabot nga panginahanglan sa industriya ug kalibotan sa trabaho.
