WALAY bisan unsang grabeng insidente sa kadagatan o sunog nga may kalabotan sa selebrasyon sa Undas ang natala sa tibuok probinsya sa Bohol karong tuiga. Kini ang gikumpirma sa Philippine Coast Guard (PCG) ug Bureau of Fire Protection (BFP).
Matod ni Lt. Junior Grade Babe Jocelie Isaga, hepe sa PCG Western Bohol, hapsay ang dagan sa pagbiyahe niadtong Nobyembre 1 ug 2. Gisusi sa ilang mga kawani ang 139 ka barko ug 518 ka motorbanca. Mokabat sa 14,604 ka pasahero ang mipanaw gikan sa Bohol, samtang 15,095 usab ang miabot sa mga pantalan — ug walay nasamdan o nawala nga sakayan.
Sa bahin sa BFP, gipahibalo ni Bohol Provincial Fire Marshal FSupt. Raul Bustaliño nga malampuson ang ilang operasyon. Ang mga gamayng sunog nga nahitabo mga insidente sa kabalayan ug walay kalabotan sa pagbisita sa mga sementeryo o uban pang kalihokan sa Undas.
Gipasalamatan sa PCG ug BFP ang ubang ahensya sa kagamhanan ug ang publiko sa pagtinabangay ug pagsunod sa mga lagda — kini ang naghatag og malinawon ug luwas nga selebrasyon sa tibuok probinsya. (RTB)
