TEMPORARYONG gibuksan ang duha ka lane sa bag-ong Clarin Bridge sa Loay sugod niadtong Biyernes. Hunyo 10 subay sa sa pagsaulog sa fiesta sa lungsod diin ang ang inagurasyon sa estruktura sunod semana pa.
Ang hepe sa Department of Public Works and Highways (DPWH) 3rd Engineering District nga si Magiting Cruz niingon nga gilibkas usab nila ang temporaryong pagdili sa mga trak ug bus.
Pabilin ang duha ka mga lane nga bukas hangtod karong gabie sa Domingo, Hunyo 12 sumala sa gihangyo ni Loay Mayor Hilario Ayuban kinsa nagpaabot nga ang kapistahan modani sa mga motorista.
Gipasabot sa DPWH nga pagkahuman sa fiesta ibalik ang half-lane kay padayon pa ang pagtrabaho sa mga kilid ug duol sa tulay.
Kaniadto, usa lang ka lane sa taytayan ang giablihan samtang gidid-an nga makaagi ang mga lapad nga sakyanan sama sa mga trak ug bus.
Ang partial nga pagsira ug pagdili tungod sa padayon nga pagsemento sa mga pamaagi sa istruktura.
Hinoon miingon si Cruz, plano nila nga permanente nga buksan ang taytay alang sa two-way traffic human ang inagurasyon nga temporaryong gitakda sa umaabot nga Hunyo 17, 2022.
Gipaabot nga motambong sa seremonyas ang mga opisyal sa nasudnong kagamhanan, posibleng lakip si Presidente Duterte.
Ang Clarin Bridge, nga mao lamang ang ikaduha nga Nielsen-type nga tulay sa nasud, partial nga giablihan kaniadtong Mayo 6, sa wala pa ang gikatakda nga inagurasyon karong buwana.
Giablihan kini sa mas sayo human nahugno ang karaang Clarin Bridge niadtong Abril 27, 2022 nga nagbilin sa upat ka mga tawo nga patay ug kapin sa usa ka dosena nga nasamdan. (RTB)
