GIHULAGWAY isip unang tinuod nga “Pambansang IPO” sa nasod ang gikatakdang pag-lista sa Mynt — ang kompanya nga nagpadagan sa GCash — sa stock market, nga maghatag og higayon sa milyon-milyong Pilipino nga mahimong tinuod nga tag-iya sa bahin sa nagdako nga digital nga ekonomiya.
Sa pag-andam sa Mynt alang sa iyang makasaysayanong unang pagtanyag sa puhunan sa publiko o Initial Public Offering (IPO), gipasabot sa tigbantay sa merkado ug komentarista sa negosyo nga si Mon Monson nga lahi kini sa ubang mga IPO nga gipahigayon kaniadto.
Dili sama sa ubang kompanya nga wala pa mailhi sa kadaghanan, ang GCash nailhan ug gigamit sa milyon-milyong Pilipino matag adlaw — gikan sa pagpadala og kwarta, pagbayad sa bayranan, pagpalit og load, pagtipig, pagpamuhunan, hangtod sa pagkuha og insyurans. Tungod niini, ang pag-apil sa stock market sa GCash adunay talagsaong kalambigit ug pag-ila sa publiko.
“Daghang Pilipino tingali wala makaila sa mga kompanya sa luyo sa nangaging mga IPO, apan ang GCash ilang nasinati mismo sa ilang kinabuhi. Mao kini ang rason nga matawag kining Pambansang IPO,” matud ni Monson.
Ang IPO dili lamang yano nga pagpangita og dugang pondo. Kini nagbukas sa pultahan aron mas daghang Pilipino ang makapili nga mahimong tinuod nga kauban sa pagdako sa usa sa pinakadako nga kompanya sa teknolohiya sa nasod — dili lamang isip tiggamit, kondili isip tighawud sa bahin sa kompanya.
Gipaabot nga makadasig kini sa mas daghang ordinaryong Pilipino nga mosulod sa kalibutan sa pagpamuhunan, tungod kay pamilyar na sila sa kaayohan nga gidala sa GCash sa ilang adlaw-adlaw nga kinabuhi. Ang paglista nagpakita usab sa pagdako sa kalig-on sa sektor sa teknolohiya sa pinansya o fintech sa nasod, nga naghatag og mas lapad nga serbisyo sa mga wala pa makatagamtam sa naandan nga sistema sa bangko.
Ang GCash karon mao ang nag-unang “finance super app” sa Pilipinas, nga naghatag og serbisyo sa pagbayad, pagpadala og kwarta, pagtipig, pagpamuhunan, insyurans, pagpautang, ug uban pa.
Nagpadayon kini sa pagtutok sa paghatag og higayon sa pinansyal nga pag-uswag sa tanang Pilipino. (RTB)
