GIMANDOAN sa Malacañang ang National Irrigation Administration (NIA) nga magpahigayon og imbestigasyon ug teknikal nga pagrepaso sa mga gikataho nga problema sa pipila ka bahin sa lateral canal system sa Mabini-Cayacay Small Reservoir Irrigation Project sa Bohol.
Kini nga direktiba gipahayag sa sulat nga gipetsahan Hulyo 23, 2026, nga gipadala ni Azzedine G. Sadsad-Morilla, Assistant Executive Secretary sa Office of the President-Malacañang, ngadto kang NIA Administrator Eduardo “Eddie” G. Guillen.
Gilakip sa maong sulat ang Resolution No. 2026-817 sa Sangguniang Panlalawigan sa Bohol, diin gihangyo ang NIA nga susihon ang mga gikataho nga problema nga nakaapekto sa mga bahin sa nasangpit nga proyekto sa irigasyon.
Gihangyo usab sa maong resolusyon ang NIA nga magporma og independent technical audit team o laing angay nga lawas sa teknikal nga ebalwasyon aron masusi pag-ayo ang kahimtang sa proyekto ug matino ang angay nga mga lakang nga buhaton.
Ang imbestigasyon ug teknikal nga pagrepaso himoon subay sa naglungtad nga mga balaod, lagda, ug regulasyon aron matino ang tukma nga aksyon sa NIA. Ang tibuok nga lakang gisugyot aron mahatagan og klarong teknikal nga pagsusi ang mga isyu ug reklamo kalabot sa sistema sa irigasyon sa Mabini-Cayacay Small Reservoir Irrigation Project. (RTB)
