WA ta mahilakip sa mga dumadapig o magdadayeg sa rehimen ni Gloria Macapal-Arroyo. Dihay daghang mitumaw nga isyu sa plunder, electoral fraud, ug alegasyon sa bribery, bisan sa mga obispo. Sa makadaghan gisulayan usab siya pag-impeach sa iyang mga kritiko. Daku ang gikatabang niadtong higayona sa presidente sa ULAP kon Union of Local Authorities of the Philippines nga si Erico Boyles Aumentado. Usa siya sa nahimong instrumento pagsalbar kang Arroyo sa mga impeachment attempts. Hinuon, sa panahon ni Presidente Aquino nabilanggo gayud si GMA.
Apan midayeg kita sa iyang kaisug ug abilidad sa pagtunhay taliwala sa mga pagsulay. Iyang naantus ang daghang mga kalisdanan, ug labaw sa tanan, nagmakanunayon sa iyang pagbarug batok sa death penalty. Mao kini ang hinungdan nga nahingangha ug nibilib kita sa dihang gikahinabi siya ni Martin Nievera sa programa niini sa ABS-CBN News Channel o ANC nga gitawag og LSS o Long Story Short. Nangutana si Martin kang GMA kung unsa ang iyang labing gustong makab-ot sa kinabuhi. Ang iyang tubag? “Gusto kong mahilangit”.
Kita usab tawhanon ug nakigbisug matag-adlaw batok sa atong mga kasaypanan ug kahuyang. Wala kita sa posisyon aron paghukom kon husto ba siya o sayup sa iyang pagtinguha nga makab-ot ang labing taas nga ganti sa kinabuhi nga mao ang langit. Alang kanato, tanan angayan ug adunay katungod nga mangandoy niini. Kung buot hunahunaon, ang hugot nga pagbarug ni GMA batok sa death penalty taliwala sa mga tentasyon sa gahum ug salapi usa gayud ka lig-ong ebidensya nga iyang gituman ang mga pagtulun-an sa Simbahang Katolik niining bahina, bisan tuod og padayon ang iyang pagsuporta sa kasamtangang nagpuyo sa Malacanang nga sagad motungo sa mga obispo, sa Santo Papa, ug bisan sa Dios.
Si GMA usa ka dayag nga ehemplo sa panultihong, “small but terrible”. Kubos lamang sa lima ka tiil ang iyang gitas-on, apan labihan kalawom ang iyang tingog, mas halawom pa sa pito ka tiil. Gihangad siya sa daghang mga politiko ug dili modagan sa bisan unsang matang sa gubat-politikanhon.
Apan angayan ba siya sa langit? Matud pa sa asoy ni San Juan, ang pinalanggang disipulo, si Ginoong Hesus Cristo misulti kang Nicodemus usa niana ka higayon: “Wala pay nakaadto sa langit gawas niadtong gikan sa langit.” (Juan 3:13). Nagpasabut ba kini nga wala na kitay paglaum? Dili, kay ang maong ebanghelyo mismo nag-ingon sa Juan 6:40, “Mao kini ang kabubut-on sa Amahan, nga ang tanang makakita sa Anak ug mosalig Kaniya makaambit sa kinabuhing dayon; ug hatagan Ko siya sa gahum sa pagkabanhaw sa kaulahian”. Busa luyo sa tanang kasakit, aduna pa kitay paglaum.
