ANG 2026 Sandugo Street Dancing Showdown ipahigayon na usab sa Carlos P. Garcia (CPG) Sports Complex sa Dakbayan sa Tagbilaran, imbes nga didto sa Lungsod sa Panglao. Kini ang gipahibalo ni Emerson Pinos, Officer‑in‑Charge (OIC) sa Center for Culture and Arts Development (CCAD), atol sa Capitol Reports niadtong miaging Biyernes.
Matod pa ni Pinos, nadesisyonan ang pagbalhin sa lugar tungod sa hangyo sa mga lokal nga kagamhanan nga moapil. Alang kanila ug sa mga manan‑aw, mas sayon ug dili layo ang pagbiyahe kon didto kini ipahigayon sa Tagbilaran, lahi kon didto sa Panglao.
Alang sa kompetisyon karong tuiga, gilimitan sa napulo ka grupo ang gitugotan nga mosalmot. Gihimo kini aron masiguro ang hapsay nga pagdumala sa badyet ug mga premyo, tungod kay ang daghang partisipante nagkinahanglan usab og dugang pondo.
Sa pagkakaron, duna nay siyam ka lokal nga kagamhanan ang opisyal nga mipadayag sa ilang tinguha nga moapil.
Ang Dakbayan sa Tagbilaran dili una moapil karong tuiga. Ang ilang badyet gigahin alang sa ilang pag‑andam sa Sinulog Street Dancing sa Sugbo nga ipahigayon sa Enero 2027. Gihimo kini aron masiguro ang maayong pag‑andam ug aron mapanalipdan ang titulo nga ilang nakuha isip kampeon sa maong kompetisyon. (RTB)
