GIHANGYO ug giawhag ni Third District Representative Kristine Alexie Besas Tutor ang Kongreso nga paspasan ang pag-apruba sa House Bill No. 831 bisan panahon sa espesyal nga sesyon.
Matod niya, andam na ang panukalang balaod alang sa pagsusi ug paghisgot sa komite bisan pa sa kasamtangang pahulay sa mga sesyon.
Sumala pa kaniya, nahuman na sa bulan sa Abril ang pag-andam sa Technical Working Group, nga naghatag na og dalan aron ang House Committee on Natural Resources makahisgot niini bisan wala pa ang regular nga sesyon.
Ang HB 831 nagtumong sa pag-ayo ug pagpalig-on sa legal nga panalipod sa Chocolate Hills Natural Monument. Tumong niini nga mapanalipdan ang kinaiyahan samtang masulbad ang dugay nang mga isyu bahin sa pribadong yuta, panginabuhian sa mga lumulupyo, ug kalamboan sa lugar.
Gipasabot usab ni Tutor nga ang maong panukalan gisuportahan nila ni Kongresista Vanessa Aumentado ug John Geesnell Yap II.
Giawhag usab niya si Kim Robert de Leon ug ang Department of Budget and Management nga magahin og igong pondo. Lakip niini ang paglakip sa gikinahanglan nga kantidad sa nasudnong badyet sa tuig 2027, ug kung mahimo, paghatag na og inisyal nga pondo karong 2026 aron masugdan dayon ang pagpatuman sa balaod sa higayon nga maaprubahan na kini.
Sa katapusan, gipasabot ni Tutor nga ang HB 831 maghatag og patas ug malungtarong solusyon sa mga isyu sa yuta ug panginabuhian sa liboan ka mga Bol-anon, samtang gisiguro ang dugay nga pagpanalipod sa bantog nga Chocolate Hills. (RTB)
