GISUGDAN na sa Sangguniang Panlungsod sa Tagbilaran ang pagsusi sa gisugyot nga ordinansa aron regulahon ang paggamit sa mga cellphone sa mga eskwelahan. Kini gihimo isip lakang sa pagpalig-on sa kasegurohan sa mga estudyante, human mahitabo ang makalilisang nga insidente sa pagpamusil sa San Jose National High School sa Dakbayan sa Tacloban.
Gisugyot ni Konsehal Gemma Inting nga ipasira o i-off ang mga cellphone sa mga tinun-an sa tibuok oras sa klase. Gitugotan ra kini gamiton kung hatagan og pagtugot sa magtutudlo alang sa mga kalihokan sa pag-eskwela, o kung adunay dinalian nga sitwasyon.
Gipresentar ni Inting ang maong sugyot atol sa regular nga sesyon sa konseho nga gipangulohan ni Bise-Mayor Adam Relson Jala. Matod niya, kabahin kini sa mga lakang aron mapalambo ang kasegurohan ug disiplina sulod sa mga tunghaan.
Sumala sa gisugyot nga balaod, ang paggamit sa cellphone dili hingpit nga gidili — gitugotan gihapon kini kung gamiton alang sa katuyoang pang-edukasyon o panahon sa emerhensya. Apan higpit nga limitahan ang personal nga paggamit niini samtang nagpadayon ang klase.
Ang maong sugyot gipasa sa Komite sa Edukasyon nga gipangulohan ni Konsehal Jose Floro Ringca, aron masusi pa kini og maayo ug andamon ang gikinahanglang mga lakang sa wala pa kini hisgutan ug aprubahan sa tibuok konseho. (RTB)
