GIPAHIGAYON ang kalihokan sa pagpahi-uli ug pagpanalipod sa mga koral sa iladong Napaling Reef nga nahimutang sa Barangay Tangnan, isip kabahin sa paningkamot aron mapasig-uli ang kahimtang sa maong lugar.
Ang maong kalihokan giorganisar sa Municipal Environment and Natural Resources Office (MENRO) sa lokal nga kagamhanan sa Panglao, sa pakigtambayayong sa Panglao Association of Dive Operators (PADO), Panglao Sea Divers and Conservation Advocates (PSDAC), Philippine Coast Guard (PCG), Philippine Coast Guard Auxiliary (PCGA) 203rd Squadron, ug Armed Forces of the Philippines (AFP).
Gipahigayon kini nga lakang human mikaylap sa sosyal nga medya ang mga hulagway ug video nga nagpakita sa pagkadaot sa Napaling Reef — usa sa labing inila ug kanunay nga duawang dapit sa mga mosalom sa Panglao.
Nahibaloan ang kahimtang sa maong lugar human gipaambit sa usa ka vlogger ang iyang kasinatian sa pagsalom, diin iyang namatikdan ang dakong kausaban ug pagkadaot sa mga koral kumpara sa mga nanglabay nga katuigan.
Tungod niini, daghang netizen ug mga tigpanalipod sa kinaiyahan ang nagpahayag sa ilang kabalaka ug nanawagan sa mga awtoridad nga susihon ang posibleng hinungdan sa pagkadaot sa maong bahin sa dagat.
Sa pagkakaron, wala pa makapagawas og opisyal nga taho ang Department of Environment and Natural Resources (DENR) aron matino ang eksaktong mga hinungdan ngano nga nadaot ang mga koral sa Napaling Reef. (RTB)
