NAPULO ug pito (17) ka lokalidad sa lalawigan sa Sugbo ug Bohol nga naigo sa Bagyong Odette niadtong Disyembre ang nakabenepisyo sa dul-an 7,000 ka sako sa bugas humay nga gidonar sa Japanese government’s Ministry of Agriculture, Forestry, and Fisheries.
Ang Department of Social Welfare and Development-Central Visayas (DSWD-7) niingon sa usa ka pamahayag niadtong Miyerkules nga siyam (9) ka local government units (LGUs) sa Bohol ug walo (8) ka lungsod sa Sugbo ang nakadawat og 30-kilos sa bugas nga donasyon.
Si DSWD-7 regional director Rebecca Geamala nagkanayon nga ang programa ipatuman pinaagi sa Tier 3 Program sa ASEAN Plus Three Emergency Rice Reserve (APTERR) alang sa Mayo.
Ang DSWD-7 pinaagi sa Disaster Response Management Division, sa pakigtambayayong sa National Food Authority (NFA-7), mi-deliver og 6,666 ka sakong bugas nga gidonar sa Japan ngadto sa mga lungsod sa Alicia, Balilihan, Calape, Carmen, Loon, Mabini, Valencia, Tubigon, ug ang dakbayan sa Tagbilaran sa Bohol ug ang mga lungsod sa Alcantara, Alcoy, Alegria, Boljoon, Ginatilan, Malabuyoc, Moalboal, ug Ronda sa habagatang Sugbo.
Sa usa ka memorandum of agreement tali sa NFA ug DSWD bahin sa pag-apod-apod sa bugas, ang field office sa social welfare agency sa Rehiyon 7 gitahasan sa pagdumala sa pagbalhin sa stocks gikan sa bodega sa NFA ngadto sa mga LGUs nga makadawat.
Gitabangan usab sa ahensya ang mga LGU sa pag-release ug pag-apod-apod sa mga donasyon nga bugas sa mga naila nang daan nga benepisyaryo.
Ang DSWD-7 nagkanayon nga ang Minister of Economic Affairs sa Embassy of Japan to the Philippines, Masahiro Nakata, DSWD-Disaster Response Management Bureau Undersecretary Felicisimo Budiongan, ug NFA Administrator Judy Carol Dansal ang mitambong sa bag-o lang nga turnover ceremony sa Balilihan, Bohol. (RTB)
