POSIBLE nga motaas na usab ang presyo sa mga produktong petrolyo, lakip na ang diesel ug gasolina, sa sunod nga semana.
Sumala sa banabana gikan sa tinubdan sa industriya sa lana, mahimong motaas ang presyo sa diesel og P2.00 ngadto sa P2.50 matag litro, samtang ang gasolina usab motaas og P0.75 ngadto sa P1.25 matag litro.
Sa laing bahin, ipaubos naman ang presyo sa krudo (kerosene) og P13.30 matag litro.
Matud pa sa maong tinubdan, nagpabiling taas ang presyo sa krudo tungod sa nagkagrabe nga mga tensyon sa politika sa Tungang Sidlakan, nga naka-apekto sa suplay sa lana sa tibuok kalibotan.
Dugang pa, gipakusog usab ang pagtaas sa presyo sa gasolina tungod sa kakuwang sa suplay ug pagkunhod sa gidaghanon sa giproseso nga lana gikan sa mga pabrika sa nagkalain-laing nasod.
Tungod sa limitadong suplay sa krudo gikan sa Tunga-tungang Sidlakan, napugos kuno ang pipila ka mga pabrika sa Asya sa paggamit og mas ubos nga klase sa krudo nga dili haom sa ilang mga pasilidad.
Kasagaran ipahibalo sa mga kompanya sa lana ang pagbag-o sa presyo matag Lunes, ug ipatuman kini pagkaugma, sa adlaw sa Martes.
Sa miaging semana, nagpataas ang mga kompanya sa lana sa presyo sa gasolina, samtang dako naman ang gipaubos nila sa presyo sa diesel ug krudo. (RTB)
