GIDUSO sa Sangguniang Panlalawigan (SP) ang temporaryo nga tax relief measures aron mamenusan ang epekto sa padayong pagsaka sa presyo sa produktong petrolyo sa mga residente ug nag-unang sektor sa ekonomiya.
Gi-aprobahan sa konseho ang usa ka resolusyon nga nag-awhag sa tanang mayors sa mga lungsod sa Bohol ug sa dakbayan sa Tagbilaran nga magpatuman og tax relief o moratorium isip dinaliang lakang batok sa nagpadayon nga fuel crisis.
Ang maong resolusyon gipangamhanan ni Board Member Nathaniel Binlod, Chairman sa Committee on Ways and Means, ug gi-aprobahan sa ulahing sesyon ubos sa pagpangulo ni Senior Board Member Tita Baja.
Ang rekomendasyon naga-gikan sa committee report sa Committee on Ways and Means, nga naglatid sa padayong pagsaka sa gasto sa transportasyon ug produksyon, hinungdan sa pagtaas usab sa presyo sa mga batakang palaliton ug serbisyo.
Si Board Member Greg Crispinito L. Jala, nga ni-isa sa isyu pinaagi sa privilege speech, miingon nga grabe na ang epekto sa fuel price surge sa mga mag-uuma, mangingisda, drayber, ug mga panimalay sa probinsya.
Gawas sa ng tax moratoriums sa LGU, girekomenda usab sa komite kauban ang fuel subsidies ug ubang porma sa financial assistance depende sa budget sa lokal nga kagamhanan isip dinaliang tabang sa katawhan.
Malaomon si Board Member Binlod nga sundon kini sa mga LGU sa Bohol aron mapagaan ang gibug-aton sa publiko taliwala sa nagpadayon nga krisis sa presyo sa gasolina. (RTB)
