MAS gipakusgan sa Sangguniang Panlalawigan sa Bohol ang kampanya batok sa rabies pinaagi sa giduso nga Provincial Ordinance No. 05-2026, nga gipasiugdahan ni Board Member Mutya Kismet Tirol.
Ang maong ordinansa nag-usab sa daang Bohol Rabies Prevention and Eradication Program aron mas mapalig-on ang implementasyon niini, ilabi na pinaagi sa pagtukod sa Bantay Rabies sa Barangay (BRB)—usa ka mekanismo nga magpatuman sa balaod hangtod sa pinakagamay nga lebel sa komunidad.
Sumala sa gisugyot ni Tirol, ang lakang nagtubag sa mandato sa Republic Act No. 9482 o Anti-Rabies Act of 2007, nga nagkinahanglan sa mga lokal nga panggamhanan nga magpatuman og lig-on ug malungtarong programa batok sa rabies, lakip ang mass vaccination sa mga iro, responsableng pag-atiman sa binuhi, ug padayon nga kampanya sa kahibalo sa publiko.
Gipasiugda usab sa ordinansa ang mandato sa Local Government Code of 1991 (RA 7160) nga nagbutang sa responsibilidad sa probinsya sa pagpanalipod sa panglawas ug kaluwasan sa katawhan, ilabi na batok sa zoonotic diseases sama sa rabies.
Sa bag-ong polisiya, mas higpitan ang pagmonitor sa mga tag-iya sa binuhi, ilabi na sa pagparehistro, bakuna, ug hustong pag-atiman sa mga iro ug iring. Pinaagi sa BRB, ang mga barangay adunay direktang papel sa pagreport sa mga paglapas, pagmonitor sa compliance, ug pagrekomenda og angay nga aksyon batok sa mga dili mosunod.
Gilauman nga pinaagi sa mas organisado ug komprehensibong pamaagi—uban ang mas lig-on nga koordinasyon sa mga ahensya ug aktibong partisipasyon sa komunidad—mapakunhod, kung dili man mapapas, ang hulga sa rabies sa probinsya.
Ang probinsyal nga panggamhanan mipasiugda nga ang kalampusan sa maong programa mag-agad sa kooperasyon sa matag panimalay, ilabi na sa responsableng pagpanag-iya sa mga binuhi. (RTB)
