NAGPADAYON ang paghatod og serbisyo sa katawhan ang Kagamhanang Probinsiyal sa Bohol ubos sa pagpangulo ni Gobernador Aris Aumentado pinaagi sa laing hugna sa Barangay Service Caravan nga gipahigayon sa Isla Jao, Talibon nga naglangkob sa mga barangay Suba, Bosali-an, ug Pinamgo, niadtong Miyerkules, Abril 15, 2026.
Tumong sa maong inisyatibo ang pagduol sa batakang serbisyo sa mga komunidad, ilabi na sa mga isla nga barangay nga lisod maabot.
Gidala sa caravan ang nagkadaiyang libreng serbisyo sama sa medical tuli alang sa kabataan, dental konsultasyon, distribusyon sa mga tambal ug bitamina, serbisyong legal nga tabang, ug uban pang programa nga direkta gipahimuslan sa mga residente sa nahisgutang mga lugar.
Dugang pa sa mga serbisyong panglawas ug pangkalinga, personal usab nga gitunol ni Gobernador Aumentado ang pundo alang sa lokal nga panginahanglan sa mga lungsod.
Ang lungsod sa Talibon nakadawat og P5,540,000.00 nga naglakip sa bahin gikan sa Sand and Gravel collections, samtang ang lungsod sa Bien Unido nakadawat og P5,000,000.00 alang sa konstruksyon sa bag-ong Public Transport Terminal.
Sa kinatibuk-an, mokabat sa P10.54 milyon ang pundo nga gihatod sa probinsya alang sa duha ka mga lungsod, uban sa presensya ni Bise Gobernador Nick Besas ug Board Member Jamie Aumentado Villamor.
Nagpabilin ang Kagamhanang Probinsiyal sa ilang paningkamot nga madala ang serbisyo sa matag Boholano, bisan pa sa kalisod sa lokasyon sa pipila ka komunidad. (RTB)
