DI MALALIS nga sige’g taas ang mga presyo sa petrolyo gumikan sa gubat sa tungatungang sidlakan. Karong bag-o dunay balita nga basin kunhoran (roll back) ang mga presyo sa lana.
Ang naka-apan lang kay kon mokunhod ang presyo sa lana, mora’g gamay ra (single digit). Kon mopatuman sa increase (double digit) niini, halos doble o taas pa kay sa pagkunhod.
Daghan ang nagtuo ug nagduda nga ang daang ‘stock’ sa gasoline, diesel ug uban pa, naabotan sa bag-ong pagtaas sa mga presyo niini, kay matag semana man (adlawng Martes) ang epekto sa gitawag nilang “price adjustment.’
Kini wa pay labot (sa hisgutanan sa ubang palaliton).Entonsis, kon ‘inventory’ pa lang, naapil sa ‘increase’ ug mahimo kining usa ka ‘overpriced,’ di ba?
Labina karong panahuna, kining pagduda kusog kaayo ‘by public perception’ tungod sa gubat sa tunga-tungang Silangan nga dakong nakapa-uyayod sa tanang nagsalig sa gasolina. Sutoy kaayo sa ‘double digit’ nga pagsaka sa mga presyo.
Kining pagduda mahimong matuod kon walay nagdiskarga sa diesel/gasolina nga tanker sa matag gas station hangtud sa alas 12 sa tungang gabii sa adlawng Lunes. Kay sa sunod adlaw (Martes) mo-epekto man ‘increase’ o ‘decrease’ sa mga presyo sa petroleum products.
Ug ang mga pangagamhanang local nagsig-iya sa pagbantay, o ‘monitor’ sa ilang tagsatagsa ka mga teritoryo diin may mga gasolinahan. Nga kinahanglan motuman ug mosunod ang matag gas station sa gi-prescribed nga presyo.
Ilakip unta sa mga LGU ang pag-monitor ug pangayoan ang mga gas stations og lista sa ‘inventory’ sa ilang petroleum products sa di pa ang ‘increase’ aron sa ingon mahibal-an ang balansi ug kon pila bang gipatungan ang daang stock sa bag-ong presyo sa pagsaka. Manghinaot ‘ta nga buhaton kini sa matag LGU. (0928-408-5238/ricobedencio@yahoo.com)
