GIPATUMAN na sa Maritime Industry Authority (MARINA) Region VII ang dinalian nga mga contingency measures diin gitugutan ang mga shipping lines sa Sugbo ug tibuok rehiyon nga mopahamtang og hangtod sa 20 porsyento (20%) nga temporary fuel surcharge o usbaw sa pletehan.
Ubos sa Advisory No. 2026-10, gawas sa pagsaka sa plete, gitugutan usab ang mga kompanya sa barko nga pakunhoran o limitahan ang ilang mga schedule sa biyahe aron makadaginot sa krudo ug masiguro nga magpadayon ang ilang operasyon taliwala sa nagkagrabe nga krisis sa lana sa Middle East nga nakaapekto sa tibuok kalibutan.
Kining maong lakang, sumala ni MARINA Administrator Sonia B. Malaluan, tuyo nga mapanalipdan ang domestic maritime transport batok sa posibleng kakuwang sa supply sa lana ug ang pagmahal sa logistics cost.
Isip dugang tabang sa industriya, gikonsiderar usab sa MARINA ang paghatag og 75 porsyento nga diskwento sa mga bayranan sa dokumento sa barko ug ang temporaryong pagsuspenso sa Annual Tonnage Fee alang sa tuig 2026.
Giklaro sa maong advisory nga kinahanglang unahon ang transportasyon sa mga batakang paliton ug gikinahanglan nga tangtangon dayon ang maong mga surcharge kon mobalik na sa normal ang presyo sa lana sa mercado. (RTB)
