SUBLING gipalanog ni Department of the Interior and Local Government (DILG) Secretary Jonvic Remulla ang iyang baruganan nga angay nang wagtangon o i-abolish ang Sangguniang Kabataan (SK) sa lebel sa barangay.
Kini nga pamahayag gihimo ni Remulla taliwala sa mga pagpangandam alang sa umaabot nga Barangay and Sangguniang Kabataan Elections (BSKE) karong Nobyembre.
Matud ni Remulla, dako ang problema sa pagpadagan sa maong konseho tungod kay base sa iyang obserbasyon, daghan sa mga opisyal sa SK ang dili na motuman sa ilang mga katungdanan sa dili pa mahuman ang ilang termino.
Gibutyag ni Remulla ang mga datos nga nagpakita sa kakuwang sa partisipasyon sa mga batan-ong opisyal. Sumala kaniya, sa unang tuig pa lang sa serbisyo, moabot na sa 50 porsyento sa mga SK officials ang dili na mo-function tungod sa nagkalain-laing rason sama sa pagtungha, pagbalhin og puy-anan, o ang pagminyo.
Dugang pa sa kalihim, sa pagsulod sa ikaduhang tuig, mosaka pa kini ngadto sa 70 porsyento diin ang maong mga opisyal dili na gyud mopakita sa ilang mga barangay.
Tungod niini, gisugyot ni Remulla nga inay magpahigayon og piniliay o eleksyon, mas maayo pa nga i-appoint na lang ang mga opisyal sa SK.
Gipasabot niya nga kon siya ang pabot-on, mas pabor siya sa hingpit nga pagwagtang sa maong sistema, apan giablihan usab niya ang posibilidad sa pagpatuman og mga mahinungdanong reporma aron mapalig-on ang youth participation.
Tumong niini nga masiguro nga ang pundo ug serbisyo alang sa mga batan-on dili mausik ug mapahimuslan sa tinuod nga nagkinahanglan. (RTB)
