NAGPOSITIBO na usab ang Tagbilaran City-Dauis bay sa presensya sa Pyrodinium bahamense, usa ka makahilo nga dinoflagellate gumikan sa paralytic shellfish poisoning (PSP), hinungdan nga nagpagawas og local shellfish advisory ang mga awtoridad.
Sa advisory nga gipetsahan Pebrero 23, 2026, gipahibalo sa Bureau of Fisheries and Aquatic Resources (BFAR) Region 7 nga ang laboratory analysis nga gihimo sa Regional Fisheries Laboratory sa mga water samples nga nakuha niadtong Pebrero 20 mikompirma sa presensya sa maong delikadong mikroorganismo.
Isip lakang sa paglikay samtang naghulat pa sa resulta sa shellfish meat analysis, gipasidan-an sa mga awtoridad ang publiko batok sa pagpanghipos, pagbaligya, ug pagkaon sa tanang matangsa shellfish ug Acetes species, nga lokal nga nailhan isip “alamang,” nga gikan sa apektadong baybayong tubig.
Apan, ang isda, pusit, alimango, ug hipon nagpabiling luwas kan-on basta kuhaon ang ilang mga sulod (entrails) ug hugasan pag-ayo ang unod ubos sa nagaagos nga tubig sa dili pa lutoon.
Gipasalig sa BFAR, uban sa koordinasyon sa mga lokal nga kagamhanan, nga padayon ang monitoring sa mga apektadong lugar aron mapanalipdan ang kahimsog sa publiko ug maminusan ang epekto niini sa lokal nga shellfish industry.
Giawhag ni BFAR Regional Director Mario Ruinata ang mga residente ug negosyante nga hugot nga sundon ang advisory aron malikayan ang posibleng mga kaso sa shellfish poisoning. (RTB)
