NATURAL, ang ganti adto gyu’s mananaug. Ang pangutana, unsa kaha’y ganti? Angay pu’ng hinuklogan. O, unsa ba g’yud ang giilogan? Unsa ang bangga?
Duha ka bangga o contests ang bag-o pang nahuman. Ang May 2022 Elections ug ang South East Asian Games. Pwes, diha gyuy mga mananaug ug diha puy nangapildi.
Si Governor-elect Aris Aumentado miluwat og usa ka memorandum nga pinetsahan og Mayo 17, 2022 diin iyang ginganlan ang duha ka dosenang mga sinaligan niya nga maoy molangkob sa iyang Transition Team. Lakip niini ang pipila nato ka higala ug igsoon sa fraternity.
Apan ang nakahatag kanatog dugang positibong pagbati mao ang paglakip niya sa 5 ka mga babaye. Sila si DTI Assistant Secretary Aster Caberte, Dr. Mariquit Derikito-Oppus sa HNU Urban Development Learning and Political Science Programs, SP Member-elect Atty. Jami Aumentado Villamor-Roxas Tan, (Fiel, naa na gyuy nakailog sa imong trono isip may kinatas-ang ngalan sa alta sociedad sa Bohol; pero nahibaw ko’ng ok ra sab kaayo nimo.), kanhi Assistant Provincial Treasurer-turned-finance consultant ni Mayor Baba Yap, Mam Priming Ontong, ug PR ug business consultant nga si Michelle Celecio.
Ang kababayen-an mao ang kaugmaon. Ako na nang gikasulat kaniadto. Mosulat pa kog dugang bahin niana puhon, ilabi na bahin kang Jami, Trisha, Aia ug uban pang mga batan-ong lideres dinhi sa atong pinanggang lalawigan.
Si Sir Dioning Balite daghag angay ipasigarbo karong panahona. Ang iyang duha ka mga hijos nga si Victor ug Neil karon Vice Governor-elect ug Mayor-elect na. Tingale si Mam Lilia nitabang gyu’g ampo aron ang ilang mga pangandoy matuman. Dugang pa ni Neil, daku sab kaayog gikatabang ang pagdupa ni Congwaps Alexie Tutor alang kaniya.
Samtang didto sa Socialist Republic of Vietnam diin gipasiugdahan ang SEA Games, ang garbo sa Bohol nga si Vanessa Sarno nga taga-Dauis (o, dapit diha sa Bool Junction) mibuntog sa kasamtangang mga weightlifting rekords bisan sa iyang kabatan-on. Ang Olympic Gold Medalist usab nga si Hidilyn Diaz nagpadayon pag-ani sa bulawan. Hasta pud ang inila na sa kalibutan nga si Carlos Yulo mi-ani usab sa mga medalyang bulawan sa natad sa gymnastics segun sa gipaabut sa tanan.
Subo hinuong palandungon nga ang atong mga lalaking basketbolista giparut sa Indonesia atul sa ilang kampeonato. Apan ang atong women’s basketball team maoy nahimong kampeon. Niadtong 2019 SEA Games, kita ang niguwang over-all champion. Karon ika-4 na lang ta, luyo sa Vietnam, Thailand ug Indonesia.
Kung maghisgut tag selebrasyon, ako gyung i-mention nga ang pagkaon maoy sentro sa salu-salo, bisan gani sa mga pagbangotan. Og karon nga abli na ang mga restaurant, sulayi ninyo ang Lantaw kung wa pa mo kaadto. Lamian ang ilang mga putaheng Pinoy didto ug presko ang hangin kay nagdungaw man kini sa Tagbilaran Bay. Kon makasuroy pud mo sa Guindulman, ayaw kalimti ang pastries sa Sticky Buns; ug didto sa Anda, mahimong i-“bringhaus” ang Pan Tawid. Piskay jamo i-pares sa Calamay sa Can-upao. Ako lang ning gisuksuk kay nakakaon na man ko ug tinuod nga lami gyud.
Ang atong panultihon karong semanaha gikan sa akong paboritong Philosopher-Scientist nga si Dr. Rudolf Steiner: “Ang makapugong sa kabangis mao lamang ang ispirituhanong edukasyon; tungod kay bugtong ang ispirituhanong edukasyon lamang ang maka-abli sa atong mga mata sa kamatuoran”.
