PORMAL nga gidayeg sa Sangguniang Panlungsod (SP) sa Tagbilaran City ang Bohol Police Provincial Office (BPPO) ug ang Tagbilaran City Police Station (TCPS) human sa malampusong pagdakop sa upat ka Chinese nationals nga gituohang nalambigit sa usa ka dakong fake iPhone scam nga nag-operate sa siyudad.
Sa usa ka resolusyon nga giaprobahan atol sa regular nga sesyon nga gipangulohan ni Vice Mayor Adam Relson Jala, giila sa konseho ang paspas ug tinabangay nga operasyon sa BPPO Provincial Intelligence Unit (PIU) uban sa TCPS, nga mitultol sa pagdakop sa mga suspetsado niadtong Enero 17, 2026, sa Espuelas Street, Barangay Poblacion III.
Ang resolusyon giduso ni City Councilor Fausto “Bebot” Budlong, chairman sa Committee on Peace, Order and Public Safety, nga miingon nga ang maong aksyon nagpakita sa propesyonalismo ug dali nga pagtubag sa kapulisan aron mapanalipdan ang publiko batok sa mga peke ug limbong nga transaksiyon.
Sumala sa kapulisan, nadakpan ang mga suspetsado samtang nagbaligya og peke nga iPhone 16 ug iPhone 17 ug nagpakaaron-ingnon nga awtorisadong representante sa Apple. Ang mga peke nga unit gibaligya sa kantidad nga ₱10,000 hangtod ₱15,000, hilabihan ka ubos kon itandi sa presyo sa merkado, aron makadani og mga biktima.
Gituohang nakahimo ang grupo og daghang transaksiyon sa nagkalain-laing lugar sa Bohol aron makuha ang salig sa publiko.
Ang mga suspetsado karon detained sa TCPS custodial facility ug giatubang ang mga kasong estafa ug uban pang may kalabutan nga paglapas sa balaod.
Giila usab sa konseho ang liderato sa Police Colonel Patricio Degay Jr., BPPO provincial director; Police Lieutenant Colonel Judymar Bonilla, deputy provincial director for administration; Police Lieutenant Colonel Joemar Sabellano Pomarejos; Police Lieutenant Noubell Largo Padernal sa PIU; ug PLt. Col. John Kareen Escober, hepe sa Tagbilaran City Police Station.
Matod sa mga opisyal sa siyudad, ang maong pagdayeg nagpakita sa lig-on nga paningkamot sa City Government sa pagpanalipod sa kaluwasan sa publiko ug sa padayon nga pagsuporta sa mga law enforcement personnel nga nagpakita og dedikasyon, integridad, ug propesyonalismo sa pag-alagad sa komunidad. (RTB)
