NAGPADAYON gihapon ang Bohol isip usa sa mga nag-unang tourist destination sa nasod, samtang misaka ang domestic tourism tibuok Pilipinas atol sa Christmas break, bisan pa sa sunod-sunod nga mga natural nga kalamidad nga nasinati sa Visayas miaging tuig, sumala sa datos nga gipagawas sa Department of Tourism (DOT).
Natala sa Panglao Island sa Bohol ang 62,240 ka turista gikan Disyembre 15 hangtod 28 sa miaging tuig, nga nagbutang niini sa ikatulong pwesto sa pinaka gibisitahang mga destinasyon sa Visayas.
Matod sa DOT, ang kusog nga pagdagsa sa mga bisita nagpasabot sa padayong papel sa Bohol isip usa ka mahinungdanong haligi sa domestic tourism sa Visayas. Gipakita usab niini ang kalig-on sa local travel.
Padayon gihapon nga nag-una ang Boracay Island sa pinakataas nga ihap sa mga turista nga nakaabot og 118,745, gisundan sa Cebu City nga adunay 102,124 ka bisita.
Ang ubang mga destinasyon sa Visayas nakatala usab og maayong numero, lakip ang Malajog Beach sa Calbayog City, Samar nga adunay 56,543 ka turista, ug ang Tacloban City nga nakaabot og 25,194 ka overnight guests.
Matod ni Tourism Secretary Christina Garcia Frasco, ang ihap sa mga nagbakasyon nagpalig-on sa kamahinungdanon sa domestic tourism isip haligi sa industriya sa turismo sa nasod. (RTB)
