NAKASIRADO ang Kagamhanang Probinsyal sa Bohol (PGBh) sa tuig 2025 nga may daghang national ug international awards, nga nagpakita sa kusog nga performance sa panggobyerno, kultura, panglawas, edukasyon, sports, ug pagdumala sa kalikupan ubos sa liderato ni Gobernador Aris Aumentado.
Gipresentar ni Gobernador Aumentado ang mga kalampusan sa probinsya atol sa presentasyon sa iyang 2025 Year-End Report, ug giingon nga mga milestone kini sa Abante Bohol nga development agenda.
Lakip sa mga pinakadakong pasidungog mao ang pagngalan sa Bohol isip Top Performer Provincial LGU sa SubayBAYANI Siete Awards 2025, nga nagpalig-on sa kahusayan sa probinsya sa paghatag og serbisyong publiko.
Nadawat usab sa probinsya ang LGU-Exemplar Award gikan sa Department of the Interior and Local Government (DILG) alang sa inobatibo nga infrastructure governance.
LIDERATO SA PANG-GOBYERNO UG ENERHIYA
MAS napalig-on pa sa Bohol ang reputasyon niini isip progresibong probinsya human kini nahimong unang provincial LGU sa Visayas nga nakapahimutang og Renewable Energy Board, nga giila sa Department of Energy–Visayas Field Office.
Sa aspeto sa ekonomiya, nahimong finalist ang Bohol sa Most Business-Friendly LGU Awards, samtang 15 ka component LGUs ang gidayeg sa Competitiveness Summit tungod sa pagpalambo sa business-enabling environment.
KULTURA UG TURISMO
USA ka dakong kalampusan sa kultura mao ang pag-apil sa Asin Tibuok, tradisyonal nga paghimo og asin sa Bohol, sa UNESCO List of Intangible Cultural Heritage in Need of Urgent Safeguarding.
Giila usab ang kusog nga performance sa turismo sa probinsya human ihatag sa Department of Tourism (DOT) ang Philippine Tourism Excellence Award alang sa Tourism Destination Province sa 1st Philippine Tourism Awards, nga nagpalig-on sa posisyon sa Bohol isip nangunang destinasyon sa turismo.
KAAYOHAN SA KATAWHAN UG PANGLAWAS
Gipalig-on sa probinsyal nga gobyerno ang social protection pinaagi sa pagpasa sa Anti-OSAEC Ordinance ug nakab-ot ang taas nga functionality rating sa Local Committee on Anti-Trafficking and Violence Against Women and their Children (LCAT-VAWC).
Lakip sa mga kalampusan sa panglawas mao ang pagdawat sa Apolinario Mabini Award alang sa blood donation, John Graunt Award sa 1st Regional Epidemiology and Surveillance Awards, pagngalan isip Best E-CLIP Implementer sa Region VII, ug taas nga ranggo sa Barangay Health Worker Performance-Based Incentive Awards.
EDUKASYON, SPORTS, UG KABATAN-ONAN
SA edukasyon, giila ang DepEd Bohol isip Most Outstanding Division Office (Large Category) sa Region VII.
Sa sports, nakaangkon ang mga atletang Boholano og 122 ka medalya—39 ka gold, 43 ka silver, ug 40 ka bronze—sa nagkalain-laing national competitions.
Sa international nga lebel, nakaangkon og gold medals sila Ma. Emely Balunan ug Jhul Ian Cañalita sa 14th ASEAN School Games sa Brunei, diin nabungkag ni Cañalita ang 20-anyos nga national record sa 3,000-meter nga athletics event.
Nadawat usab sa probinsya ang pagdayeg alang sa excellence in solid waste management ug nahimong unang probinsya nga nakakuha og Level I accreditation gikan sa Youthlead Philippines tungod sa mga inobasyon alang sa kabatan-onan.
Sumala ni Governor Aumentado nga ang sunod-sunod nga pasidungog nagpakita sa lig-on nga paningkamot sa pamunoan sa Kagamhanang Probinsyal sa maayong panggobyerno, inklusibong kalamboan, ug malungtarong kauswagan, samtang padayon nga nag-uswag ang Bohol ubos sa Abante Bohol nga bandera. (RTB)
