MIHANGYO ang Island Wonders Ocean & Nature Park Corporation (IWON), operator sa whale shark interaction program sa lungsod sa Lila, nga hatagan sila og konsiderasyon sa ilang position paper nga gisumite sa Sangguniang Panlalawigan sa Bohol kalabot sa planong pag-usab sa Provincial Ordinance No. 2020-008.
Sumala sa IWON, sukad pa sa 2019 ilang gipaniguro nga ang whale shark tourism sa Lila luyong sa kaluwasan, kabag-ohan, ug kalikupan.
Ang ilang operasyon gibase sa siyentipikong pagtuon ug responsable nga pagdumala aron maprotektahan ang whale sharks ug ang komunidad nga nagasalig niini.
Gisugyot sa kompanya nga imbis total ban sa feeding, ipatuman ang regulado ug responsable nga provisioning, base sa datos nga nagpakita nga dili kini makadaot sa mga whale shark ug dili usab makabalda sa ilang natural nga paglihok.
Gipasabot usab sa IWON nga ang whale shark tourism usa ka vital nga haligi sa lokal nga ekonomiya, diin daghang residente ang nagasalig niini isip panginabuhian.
Sukad sa pag-undang sa operasyon, daghang pamilya ang nawagtangan og kita, lakip ang mga bangkero nga miingon nga, “The whale sharks didn’t leave Lila. We did.”
Kalabot sa proposed na seasonal operation (November to May), giingon sa IWON nga halos matag bulan adunay whale shark sightings sa Lila, busa dili makatarunganon ang taas nga off-season nga makapugong sa ilang panginabuhian.
Sa isyu sa Sewage Treatment Plant (STP), nagtuo sila nga dili kinahanglan ipugos kini sa tanan operator, ilabi na sa gagmay nga community-based groups nga adunay na man kaugalingong waste management system ug regular nga monitoring.
Sa iyang pahayag, si Arnielo S. Olandria, presidente sa IWON, mitumbok nga ang ilang tumong mao ang pagpadayon sa sustainable ug responsible tourism nga magkauban ang kalikupan ug katawhan. (RTB)
