NAGPASIDAAN ang Office of the Civil Defense sa Eastern Visayas nga mag andam sa posibleng mahitabo panahon nga mulihok ang pinakadako nga fault line nga anaa nahimutang sa Eastern Visayas.
Ang maong fault line gikunsidera sa Philvolcs nga “The Bigger One” nga mas pinakadako nga fault line kaysa sa naa didto sa Manila.
Matod pa ni Director Lord Byron Torrecarion sa Office of Civil Defense (OCD), sa usa ka interview sa Eastern Visayas News, base sa pagtoon sa Philvolcs, kung ang kakusgon sa paglihok sa Philippine Trench o fault line muabot ug Magnitude 7.0, posible kining magdala ug Tsunami sa mga lugar nga dool sa Pacific Ocean sama sa Eastern Samar, Northern Samar, Leyte ug Southern Leyte.
Samtang, kung ang paglihok sa Philippine Trench gikan sa Northern Samar ug kung ugaling anaa sa magnitude 7.9 ang linog, posibleng muabot sa siyam (9) ka metros ang katas-on sa tsunami susama sa katas-on sa three-storey building.
Ug kung gikan naman sa Leyte mahitabo ang parehong kakusog nga magnitude level, posibleng muabot sa 4-5 metros ang katas-on sa tsunami.
Samtang kung sa Dinagat ug Samar naman kini mahitabo, gibanabana nga muabot sa 4-7 metros ang katas-on sa tsunami sa Leyte ug sa Northern Samar naan mga 8-9 metros ang katas-on.
Ang pinakaulhing pag monitor sa Phivolcs mao ang pag lihok sa Philippine Trench dinhi sa Ormoc City niadtong tuig 2017.
Base sa pagtoon sa Philvolcs, ang mga lugar nga maagian sa Philippine Fault Zone o Fault Line dinhi sa Eastern Visayas dool sa Ormoc City, Kananga, Albuera, Burauen, Mahaplag, Javier, Capoocan, Macarthur, La Paz, Abuyog sa Leyte; Sogod, Libagon, St. Bernard, Lilo-an ug San Ricardo sa So. Leyte; Taft, San Julian, Borongan City, Balangiga ug Lawaan sa Eastern Samar; Marabut, Basey, Pinabacdao, Hinabangan sa Samar; ug Allen, Victoria ug San Isidro sa Northern Samar.
Giklaro ni Director Torrecarion nga ang gisabwag nga impormasyon dili sa paghadlok sa publiko kundi sa pagpahimangno o pagsuhestyon lamang nga mag andam pirmi sa mga posibleng mahitabo nga kalamidad.
Padayon sab sa paghatag ug mga trainings ang Office of the Civil Defense ngadto sa mga LGUs ug gi awhag sila nga padayon sa pag upgrade sa ilang mga ekipo nga magamit panahon sa kalamidad sama sa linog. (RTB)
