NIPAHIGAYON si Archbishop-designate Alberto “Abet” Uy, og nagkadaiyang kalihukan sa wala pa ang iyang Canonical installation kaniadtong September 30, 2025.
Lakip niini ang pagpahigayon og misa sulod sa St. Joseph Chapel nga nahimutang sa Archbishop Palace nga gitambongan sa mga mahimong makauban sa arsobispo ug lakip sa mga bisita.
Human sa santos nga misa gisunod gilayon ang pagpananom sa arsobispo ug tulo ka kahoy nga naglangkob sa Narra, Molave ug Mahogany sulod sa Archbishop palace nga gihingalan niini sa tulo ka anghel nga sila si Michael, Gabriel ug Raphael.
Ang arsobispo naila sa iyang advocacy nga tigpanalipod sa kinaiyahan.
Sunod usab nga gipahigayon sa Arsobispo ang pagpakaon sa mga gigutom diha sa Balay sa Kalooy nga nahimutang sa kilid sa simbahan sa Mabolo.
Ang Balay sa Kalooy maoy bunga sa nahitabong International Eucharistic Congress niadtong 2016 sa Sugbo diin ang Archdiocese of Cebu maoy host. Mapasalamaton si Bishop Uy sa nagdumala ug sa mga nisuporta sa maong programa nga nagtabang sa mga kabus ug nanginahanglan.
Ang arsobispo niawhag sa kabataan nga naa sa Balay sa Kalooy sa pagtawag kaniya ug Archbishop Papa Abet isip ilang amahan sa tanang panahon.
Gibisita usab ni bishop Uy ang Basilica Minore del Santo Niño, diin gisugat siya sa mga kaparian ug sa mga manindahay og kandila. Gisunod gilayon ang pagbisita niini sa Magellans Cross dayon ngadto na sa Cebu City Hall diin gisugat siya ug sayaw sa mga sinulog dancers lahus na sa paghimamat sa mga opisyal sa siyudad.
Gipahigayon gilayon ang civic reception uban sa mga opisyal sa siyudad.
Ang arsobispo, makighiusa sa mga Sugbuanon sa pagbatok sa korapsyon sama sa flood control ug ghost project, ug mas maayo buhaton ang mga proyekto nga iya sa Ginoo.
“No to ghost projects, yes to Godly projects”, tipik sa mensahe ni Uy nga iyang gipadungog atol sa iyang pagbisita sa City Hall.
Samtang si Cebu City mayor Nestor Archival sa iyang bahin malaumon sa kolaborasyon sa LGU ug sa simbahan nga magbunga og mas epektibong resulta kay masangyaw man sa simbahan ang ilang panawagan mahitungod sa baha og basura.
Si Uy mipadayag nga gikalipay niya ang mga inisyatibo ni mayor Archival sama sa paghulip sa paggamit og mga plastic bottles ngadto sa paggamit og mga tumbler ug ang proper waste management. (RTB)
