GILUSAD sa Department of Social Welfare and Development (DSWD) Central Visayas ang labing unang Manual of Operations alang sa Social Pension for Indigent Senior Citizens Program, nga naglakip na karon sa cross-matching sa mga datos uban sa Social Security System (SSS).
Ang programa naghatag og P1,000 nga binuwan nga stipend alang sa mga indigent senior citizen nga wala nagdawat og laing pension gikan sa gobyerno, busa ang mga SSS pensioner dili kwalipikado.
Sa taho ni DSWD-7 Program Focal Person Dr. Daisy Ocar, sa 299,737 nga kasamtangang mga benepisyaryo, 8,133 niini ang SSS pensioners. Kini sila gitangtang na sa listahan, samtang ang mga bag-ong potensyal nga benepisyaryo gi-validate ug gisumite alang sa cross-matching aron ilisan ang nakit-ang dili kwalipikado.
Nunot niini, gipahibawo sa mga opisyal sa DSWD nga kini nga pakigtambayayong sa SSS ug bag-ong guidelines nagtinguha sa paghimo og mas tukma ug kasaligang listahan sa mga benepisyaryo, nga dili lamang magsiguro sa patas ug kaepisyente sa programa, apan mosangpot usab sa mas klarong pagsabot sa mga senior citizen ug ilang mga pamilya bahin sa mga palisiya niini.
Sa ubang bahin, kasamtangang nagpadayon ang payout sa Social Pension for Indigent Senior Citizens Program alang sa 3rd Quarter sa 2025 sa Central Visayas, diin mokabat sa 86,309 sa 226,929 ka benepisyaryo ang nakadawat na sa ilang mga stipend hangtod Septiyembre 22, nga nagpakita sa 38 porsyento nga payout rate.
Gipasalig ni Regional Director Shalaine Marie Lucero nga ang mga LGUs gitahasan na nga kompletohon ang payout sa Septiyembre 30 aron ang matag kwalipikado nga benepisyaryo makatagamtam sa ilang government-funded stipend.
Si Lucero nipasabot nga ang DSWD mobalhin og pundo direkta ngadto sa mga LGUs, nga maoy modumala sa scheduling sa ilang tagsa-tagsa ka lugar.
Dugang pa niini nga ang DSWD-7 nag-monitor na lamang karon sa 226,929 ka mga benepisyaryo gikan sa 299,737, human ang bag-ong natukod nga Negros Island Region hingpit na nga mihupot sa responsibilidad alang sa Negros Oriental ug Siquijor. (RTB)
