MIPASIUGDA ang Panggamhanan sa Probinsiya sa Bohol (PGBh) sa ilang tinguha sa pagpakunhod sa kakabos ug pagpalambo sa malungtarong kalamboan.
Ang mga opisyal gikan sa nag-unang mga opisina sa probinsya ug mga ahensya sa rehiyonal nga linya nagpresentar sa ilang mga programa sa tabang sa panginabuhi, pagmugna og trabaho, ug promosyon sa agrikultura.
Matod ni Executive Assistant Gil Bongato sa Provincial Cooperative Development Office (PCDO), ilang gitutokan ang pagpaubos sa poverty incidence sa Bohol, nga, matod niya, padayon nga niubos sukad pa sa unang termino ni Gobernador Aris Aumentado.
Gikan sa 18 porsyento sa 2021, siya miingon nga ang poverty incidence sa probinsya mius-os ngadto sa 15.5 porsyento sa 2023. Ang ilang target mao ang pagpaubos pa niini ngadto sa 8 porsyento.
“Ani ta maghatag og livelihood projects sa mga POs nga naa karon nahimutang sa mga GIDA or geographically isolated and disadvantaged areas. Naa diha ang atong mga less fortunate Boholanos that need help and intervention sa atong provincial government,” sumala pa ni Bongato.
Ang PCDO gitahasan sa gobernador nga tutukan ang 24 ka lungsod sa probinsiya nga giila nga adunay labing taas nga poverty incidence, ug ang 346 ka barangay nga gikonsiderar nga GIDA.
Si Jude Bernard Guieb sa Bohol Economic Development and Investment Promotion Office (BEDIPO) miingon nga ang probinsiya aktibo usab nga nagsuporta sa micro, small, and medium enterprises (MSMEs) ug nag-abag sa dagkong mga tigpamuhunan sa pag-aghat sa pribadong sektor nga makamugna og trabaho.
Ang gobyerno, ingon niya, dili mahimo nga mag-inusara. Ang pribadong sektor, pinaagi sa mga negosyo, nagdula usab ug dakong papel sa pagmugna ug dugang trabaho ug ekonomikanhong kahigayonan sa mga Boholano.
AGRICULTURAL PROMOTION
Sa natad sa suporta alang sa sektor sa agrikultura, ang Department of Agriculture (DA) ug ang Office of the Provincial Agriculturist (OPA) nagtaho sa halapad nga suporta nga mga programa alang sa humay, mais, mga high-value crops, ug kahayupan.
Si Roman Dabalos, Agricultural Program Coordinating Officer sa DA-7 sa Bohol, nipaambit nga ang ilang buhatan niapod-apod og hybrid nga mga binhi, abono, makinarya sa uma, ug cash assistance ngadto sa liboan ka mga mag-uuma sa lalawigan.
Ang mga espesyal nga proyekto, sama sa Special Area for Agriculture Development (SAAD) ug ang Kabuhayan at Kaunlaran ng Kababayang Katutubo o 4K Program para sa mga lumad, naghatag ug livestock modules, seeds, ug training sa mga giila nga komunidad.
Si Gertrudes Fuentes, Head sa Crop Division sa OPA, nitaho nga kapin sa 15,000 ka sako sa certified rice seeds ug organic fertilizers ang iapud-apod ngadto sa lain-laing mga mag-uuma alang sa ikaduhang pagpananom, kauban ang suporta sa mga mag-uuma sa balanghoy, hybrid corn, ug high-value vegetable production.
Siya midugang nga ang probinsya nagduso sa iyang “vegetable corridor” nga programa aron sa pagdugang sa lokal nga suplay sa utanon ug pag-apod-apod sa mga seedling sa prutas aron paglainlain ang kita sa umahan.
Gikan sa bahin sa social welfare, si Floriza Singcol sa Office of the Provincial Social Welfare and Development (OPSWD) mipaambit bahin sa mga programa sa panginabuhian alang sa mga kanhi rebelde, grupo sa kababayen-an, child development workers, ug solo nga mga ginikanan sa mga piniling lungsod.
Siya miingon nga sila naka-focus sa pagbayaw sa mga huyang ug marginalized nga mga sektor pinaagi sa konkreto nga livelihood projects.
Si Gobernador Erico Aristotle Aumentado, uban sa Strategic Change Agenda sa iyang administrasyon, nagduso alang sa malungtaron ug inklusibo nga pagtubo alang sa mga Boholano pinaagi sa lain-laing mga programa sa daghang mga sektor.
Pinaagi sa paghiusa sa mga inisyatibo sa probinsiya uban sa mga programa sa nasudnong kagamhanan, gitumong sa Bohol nga dili lamang mapaubos ang insidente sa kakabus kondili mapadayon usab ang mga kalamboan nga nakab-ot niini sa bag-ohay nga katuigan. (RTB)
