ANAA ni Bohol Governor Aris Aumentado ug Cebu City Mayor Nestor Archival ang pilion ni Presidente Ferdinand “Bongbong” Marcos Jr. nga maoy mangulo sa Regional Development Council sa Central Visayas (RDC-7).
Kini human nga mibalibad si Cebu Governor Pamela Baricuatro nga mahimong nominee isip chairperson sa RDC-7 atol sa full council meeting organizational meeting karong bag-o.
Pag-abot sa private sector, ang nominado mao sila si Argeo Melisimo sa Bohol ug Melanie Ng sa Cebu.
Ang listahan sa mga nominado isumiter ngadto kang Presidente Marcos aron alang sa pagpili ug approval niini.
Salig si Aumentado nga dako ang matampo ni Archival sa RDC sanglit iya kining gihulagway nga “workaholic” ug adunay mga maayong plano si Archival.
Ang RDC maoy nagsilbi nga policymaking ug coordinating body alang sa mga development planning sa rehiyon diin ang mga dagkong programa ug proyekto nga ipatuman sa mga probinsya sa usa ka rehiyon kinahanglan adunay approval o endorsement gikan sa RDC una pa kini isumiter sa kaulohan ug mapondohan.
Sa mga proyekto sa Bohol, matod ni Aumentado aduna pa silay mga proyekto sa imprastraktura sa ilang lalawigan nga wala pa mapondohe, sama sa taytayan gikan sa Tagbilaran padulong sa Dauis Panglao nga aprobado na sa RDC apan kinahanglan pa i-follow-up.
Buot usab nga mapatuman sa gobernador sa Bohol ang expansion sa airport sa lalawigan aron makaadto na ang mga dagkong eroplano sa mga international flights ug ang tubig sa Probinsya nga kinahanglan pa palamboon.
Pag-abot sa giplano nga taytayan nga magdugtong sa Bohol ug sa Cebu island, matod ni Aumentado nga ang SugBohol bridge layo pa sa kamatuoran, sanglit bisan og feasiblitiy study wala pay nahimo alang sa maong taytayan.
Apan kon adunay pribadong investor nga andam mogasto niini gikan sa feasibility study hangtod sa konstruksyon ug operasyon o ipaubos sa Public-Private Partnership (PPP). (RTB)
