GI-KWESTYON ni ‘Tigpanalipod’ Atty. Jordan Matig-a Pizarras ang desisyon sa Ombudsman nga si Samuel Martires nga i-reprimand ang 13 ka mga personahe kabahin sa Captain’s Peak issue.
Ang maong reklamong administratibo giduso sa Field Investigation Office sa Buhatan sa Ombudsman kon diin gi-alegar nga ang mga opisyales ‘committed grave misconduct, gross neglect of duty and conduct prejudicial to the best interest of the service’.
Kini naglakip nila Gob. Erico Aristotle Aumentado, Sagbayan Mayor Junjun Suarez, Mayor kaniadto karon Bise Mayor sa Batuan Atty. Antonino M. Jumawid, mayor kaniadto sa Catigbian nga si Elizabeth Mandin-Pace, kanhi mayor sa Catigbian Boy Lurot, mayor kaniadto sa Clarin Allen Rey Z. Piezas, Mayor Engr. Eugeniano E. Ibarra , Mayor Norman Palacio sa Bilar, kanhi mayor sa Sierra Bullones nga si Dodie Maestrado, Mayor Atty. Michael Doria sa Sierra Bullones, Valencia Mayor Engr. Dionisio Niel A. Balite, Bise Mayor Ronnie Maligmat sa Bilar ug Joel Elumba, kanhi Regional Director sa Department of Agriculture Region 7.
Ang maong mga personahe mga myembro sa Executive Committee sa Chocolate Hillas Natural Monument (CHNM)-PAMB 2018-2022 absent sa mga tigum nga gipanghimo.
“Kining retired na nga Ombudsman bright kaayo. Maayo na lang retired na !! Murag gi -ango ango.”
“Gi-reprimand ang mga absent sa PamB meeting! “
“Unsay may imong atraso o sala kung wala ka mo-approve sa resolution kay wala ka diha!” pamahayag pa ni Atty. Pizarras sa iyang social media page. (Kahlil Lester O. Camba)
