UPAT ka barangay sa Isla de Pitogo ang benepisyaryo sa P.E.A.C.E. Caravan nga gipahigayon sa Bohol Police Provincial Office (BPPO) sa Barangay Bonbonon, Pres. Carlos P. Garcia Hulyo 24, uban sa pagtambayayong sa Kagamhanang Probinsyal sa Bohol, ubos sa liderato ni Gobernador Erico Aristotle Aumentado.
Mikabat sa 659 ka mga pamilya ang nakadawat sa bugas ug mga delata gikan sa Kapitolyo pinaagi sa opisina sa Provincial Social Welfare and Development para sa Barangay Bonbonon, Tugnao, Tugas ug Saguise .
Ang Bohol Provincial Medical and Dental Team nagpahigayon og libreng Blood Sugar and Cholesterol Test, ibot sa ngipon; nanghatag og libreng mga tambal ug bitamina diin giabagan kini sa LGU-Pres CPG.
Libreng antyuhos ang hatod sa Tagbilaran Dagohoy Lions Club ngadto sa mga senior citizens.
Nagtanyag sa libreng tupi ang 47th IB Philippine Army ug ang kapulisan, nagpang-ayo sa mga guba nga appliances gikan sa mga residente aron magamit kini pagbalik.
Ang mga tinugyanan sa Oro Integrated Cooperative, school supplies ang giapod-apod para sa mga kabataan.
Samtang sa laing bahin, gi-turn over usab ni Gobernador Aris Aumentado ang tseke nga nagkantidad og Php244,455 ngadto sa Canmangao Women’s Workers Association, pondo pangpuhunan para sa ilang pagpamuhi og kanding. Kini ubos sa pagpahiluna sa Provincial Cooperative Development Office.
“Taliwala sa kainit sa panahon, mas nadasig kami pagsuroy sa Isla, paghatod sa mga kaayuhan gikan sa Kapitolyo kay importante alang kanato ang mga lumulupyo sa kaislahan.
Uban sa atong kapulisan ug Philippine Army, gusto nato nga ipaabot sa atong mga kaigsoonan, ang mensahe nga adunay Gobyerno nga nagpakabana sa ilang panginahanglan, tinguha nato ang kalinaw ning maong isla,” matud ni Aumentado.
Isip usa ka UNESCO Global Geopark, tinguha sa Gobernador nga makabaton sa kapanginabuhian ang katawhan nga anaa sa ubos nga hut-ong sa katilingban, maipadangat ang mensahe sa kalinaw ngadto sa tanan ug ang pagpanalipod sa kalikopan.
Ang P.E.A.C.E. Caravan nga gipasiugdahan sa BPPO sa pagpanguna ni PLTCOL Norman Nuez ug PLT Conrado Butil, mainitong gisuportahan ni Gobernador Aumentado. Gawas ni Aumentado ang kalihukan gitambongan usab nila ni Mayor Kenneth Estavilla, Vice Mayor Wilma Dusal, ug ubang opisyales sa lungsod, mga kapitanes ug uban pang mga opisyal sa upat ka barangay. (RTB)
