WALA pa’y usa ka semana human gitak-upan ang national ug local elections gikan sa Presidente hangtud sa bugno sa municipal councilors apan ana-a na usab ang laing hisgutanan sa Piniliay — ang Barangay ug SK elections karong Disyembre niining tuiga.
Gani, anaay mga kauban sa partido nga nideklarar na nga magpapili karong Disyembre.
Ako sa akong bahin, wala nako sirad-i ang posibilidad nga magpapili usab sa barangay isip kagawad.
Nahurot man tuod kami og kapildi sa municipal slate apan nabawi man pud sa probinsya kay kapin 80 porsyento ang nakadaug namo sa province.
Anaay mga nigawas nga istorya nga ang mga nidaug kuno sa laing partido dili hingpit nga malipayon kay wala silay pako (dili ilaha ang pinakataas sa probinsya). Kana, base sa istorya nga nikatap.
Ana-a usab ang hungihong nga anaay mga nidaug sa laing pundok nga nihilak kuno kay lage, dili ilaha ang mayorya sa nidaug sa probinsya.
Para nako, dili babag ang nagkalahi-lahi nga kulay sa pulitika kun mu-kooperar lang, kay ang katuyoan sa pagpapili mao man ang pagserbisyo sa katawhan.
Balik ta sa Barangay ug SK elections, nagkanindot ang istorya human sa resulta sa Mayo 9.
Nagplastada na ang uban sa mga “prospects” alang karong Disyembre 2022.
Ang nakanindot sa lumba sa barangay kay dali ra ang pagkampanya kay 7 ra man ka mga Purok. Sayon usab ang pag-ila sa ka-partido ug dili kauban sa grupo.
Pero anaay mga istorya nga dili kuno malahos ang Eleksyon karong Disyembre. Apan kining tanang pulos pa tsismis kay wala pa may kumpirmasyon gikan sa Comelec.
Kun malahos, mas maayo kay makapili kita og mga bag-ong lider ilabina kun wala na kaangay sa mga kasamtangang naglingkod.
Alang sa mayorya sa mga naglingkod, mas maayo kun dili malahos kay malugwayan ang ilang termino ug maka-save sa gastuhon.
Hangtud wala pa’y desisyon nga dili malahos, magpadayon ang nindot nga istorya ilabina sa mga naghinam-hinam na nga mudagan sa barangay.
Sa pagka-karon, maghuwat sa ta sa paglingkod sa mga napili karong Hunyo 30.
Wala gihapon kita’y nag-unang damgo nga unta magtinarong sa ilang pag-alagad ang mga napili.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Mudawat lamang og seryoso ug dili binuang. Mag-amping kita, mga Bol-anon!
