NIABOT sa 3,199 ka wanted persons ang nadakpan sa Police Regional Office-7 sa nagkalain-lain nila nga police operations sa Central Visayas gikan sa Enero hangtud sa Hulyo 2025.
Apil sa nadakpan mao ang 502 most wanted persons nga gi-categorized sa managlahi nga level. Samtang 304 niini nabutang isip Regional ug Provincial level, 54 ang city-level, 137 municipal level ug 7 ang station level.
Ang nahibiling 2,697 na butang isip other wanted persons, ang tanan dunay outstanding warrants of arrests sa nagkalain-laing krimen.
Si PRO-7 Regional Director Police Brigadier General Redrico Maranan nangangkon nga epektibo ang intensified manhunt operation sa rehiyon.
“These arrests reflect our commitment to justice and our relentless drive to protect the people of Central Visayas. This is a direct response to the directive of our Chief PNP, PGen Nicolas D Torre III, to pursue and apprehend all fugitives from the law,” sigon ni Maranan.
Ang maong mga dakop produkto matud pa sa well-coordinated operations nga gipatuman sa PRO7’s provincial, city ug municipal police units inabagan sa intelligence groups ug partner agencies.
Mibahad sab kini sa mga indibidwal nga dunay outstanding warrants nga ang PRO-7 dili molugak sa paggukod nila.
DRUG LORDS NADAKPAN
MOABOT sa P307 milyones nga balor sa ilegal nga drugas ang nasakmit sa Police Regional Office (PRO 7), samtang 25 ka mga drug lords ang nasikop sulod sa lima ka buwan nga anti-illegal drug operation gikan Enero ngadto sa Mayo 2025.
Sa 25 ka drug lords nga nadakpan, 10 niini gikan sa siyudad sa Mandaue, pito sa Bohol, unom sa dakbayan sa Sugbo, usa sa Lapu-Lapu ug usa usab sa probinsya sa Sugbo.
Kini nga mga dagkong drug player nga nangadakpan ubos sa pamunoan ni PRO 7 Chief Brigadier General Redrico Maranan maoy nagsilbing major suppliers sa ilegal nga drugas sa tibuok rehiyon.
“These drug lords are at the top of the chain. They are the ones who keep the illegal supply flowing. That’s why we are raising the level of our efforts to go after these sources and cut them off before they reach our communities,” matud ni Maranan.
Gidugang ni Maranan nga dakog papel sa pagkasikop sa maong mga drug lords ang walay hunong nga suporta sa komunidad. (RTB)
