GIPADAYAG sa Department of Public Works and Highways (DPWH) nga mahuman ang pagtukod sa ilang flood-control project sa Tagbilaran City sa sunod buwan sa tinguha nga masulbad ang kanunay nga pagbaha sa CPG Avenue sa dili pa ang kataas sa ting-uwan.
Matod ni DPWH First District Engineer John Paul Gascon, ilang kompletohon ang pag-instalar sa mga tubo ug inter-connection sa drainage systems sa daplin sa dalan ug Peñaflor Street.
Ang gipaayo nga drainage system magtugot sa tubig sa ulan nga natipon-og sa CPG Avenue nga moagas ngadto sa mga tubo nga gitaod sa dalan Peñaflor.
“If mahuman na ang whole stretch of the pipe sa ilawom, itap na namo ang drainage from CPG, near Bohol Wisdom [School], going to Peñaflor. Karon dili pa nato ma tap kay open pa ang drainage sa ubos. If itap na namo karon, mo baha sa Peñaflor kay dili pa connected ang drainage, so if ma connect nato wala nay flooding diha, and before July ma-connect na,” sigon ni Gascon.
Nasayran nga daling mobaha ang taas nga bahin sa CPG Avenue duol sa Bohol Wisdom School bisan sa hinay nga pag-uwan.
Dugay na kining nakakuha og reklamo sa publiko, hinungdan nga gisugdan na sa DPWH ang flood-control project niadtong Septiyembre sa miaging tuig.
Kinatibuk-ang P75 milyones ang gigahin sa nasudnong kagamhanan aron matubag ang dugay nang problema.
Gipasalig ni Gascon nga ang bag-ong drainage system makasugakod sa daghang tubig sa ulan. “Ang ginawa naming drainage kaya i-accommodate ang baha kahit four times ng [size] ng Bohol Wisdom School. ‘Wag lang uulan for two week straight, kasi pag ganyan babaha talaga,” dugang ni Gascon.
Matod ni Gascon, nagpaabot pa sila sa gahin sa Tagbilaran City government og site alang sa treatment facility nga makatugot sa DPWH sa paglabay sa tubig baha ngadto sa Tagbilaran City Bay.
Hinuon iyang namatikdan nga ang gipaayo nga drainage system igo na aron matubag ang problema sa pagbaha subay sa CPG Avenue bisan pa nga dili na kinahanglan nga ipagawas ang tubig baha sa baybayon agi sa Brgy. Taloto ning syudad. (RTB)
