USA ka Solar-Powered Water Project nga adunay UV Filtration System ang giinagurahan niadtong Hunyo 25, 2025, sa Purok 5, Pangpang, Ubay, Bohol.
Ang proyekto gipangunahan sa Sibol ng Agham at Teknolohiya (SIBAT Inc.) uban ang suporta sa pondo gikan sa German Embassy sa Manila, ug MISEREOR, usa ka German Catholic bishop’s organization for development cooperation.
Ang inisyatiba nagpaila sa usa ka renewable energy-powered water system nga adunay UV filtration aron makunhuran ang mga risgo sa panglawas ug mamenosan ang gasto sa panimalay alang sa purified water.
Ang proyekto, motubag sa dugay na nga kakuwang sa tubig nga mainom sa komunidad sa kabaybayonan diin ang mga residente nagsalig sa pagpanguma ug pagpangisda apan naglisud sa pag-access sa tubig.
Ang Deputy Head of Mission sa German Embassy Mathias Kruse, SIBAT Executive Director Estrella Catarata, Executive Assistant Arturo Mendez Evangelista nga nagrepresentar ni Gobernador Aris Aumentado, ug Barangay Kagawad Danilo Santinas maoy nangulo sa turnover ceremony.
“Misalig mi nga inyo ning ampingan, kay para ra sad nis inyong kaayuhan,” giingnan ni Catarata ang mga residente.
Gipaambit usab ni Catarata nga ang proyekto tulo ka tuig sa paghimo, nga adunay daghang mga hagit nga giatubang.
“We are not just responding to a basic need, we are investing in the health, dignity, and future of Pangpang’s people,” sigon pa ni Aumentado.
Ang adviser sa PAFFO nga si Juceded Torcende nihangyo sa kagamhanang probinsiyal nga tabangan ang paghatag og mga sudlanan sa tubig matag pamilya ug tabangan ang pagkuha og permit sa pasilidad.
Ang PAFFO Chairperson Rojelio Luminarias nagpasalamat usab sa mga kauban sa proyekto.
“Kini usa usab ka porma sa diplomasya,” ingon ni Kruse, nga nagpasiugda sa padayon nga suporta sa Alemanya alang sa pag-uswag sa ekonomiya sa Pilipinas sukad 1973.
Sa miaging tuig, gilusad usab sa SIBAT ang susamang mga proyekto sa Sitio Mahayahay, Barangay Montesuerte, Carmen, ug Sitio Banat-e, Barangay San Jose, Mabini.
Ang renewable energy-powered water system nga adunay UV filtration mao ang una sa iyang matang sa Bohol ug makaprodyus og 200 gallons nga treated water kada adlaw.
Dugang pa, ang tubig ipaubos sa laboratory testing aron masiguro ang kaluwasan, nga adunay inisyal nga gisugyot nga presyo nga P10 matag galon nga nag-una sa mga miyembro sa Pangpang Farmers and Fishermen’s Organization (PAFFO).
Duha (2) ka miyembro sa PAFFO ang pagabansayon sa SIBAT isip technician ug makadawat og allowances ug honoraria.
Ang proyekto makonektar sa BOHECO grid kung makuha na ang gikinahanglan nga mga dokumento ug permit.
Kini nahiuyon sa Strategic Change Agenda sa Bohol alang sa inklusibo ug accessible nga mga batakang serbisyo ug nagsuporta sa pagtudlo sa lalawigan isip una ug bugtong UNESCO Global Geopark sa Pilipinas pinaagi sa pag-asdang sa malungtaron, lig-on, mga solusyon nga gipalihok sa komunidad. (RTB)
