TAGBILARAN CITY, Bohol (PIA) — Gilauman nga ang pagtugyan sa Panglao Bohol International Airport (PBIA) ngadto sa Aboitiz InfraCapital (AIC) niining buwana, magtugpo sa ekonomikanhong pag-ugmad sa lalawigan.
Sa pagtugyan, nakakabit ang gilaraw nga mga upgrades nga makadugang sa turismo ug rehiyonal nga kaugmaran sa tugpahanan ug mismo sa Bohol, segun sa AIC.
Gikataho sa Philippine Statistics Authority niadtong Disyembre 2024, nga ang pagtaas ngadto sa 6.6 porsyento sa Gross Domestic Product sa Bohol sa 2023 nga minglabaw pa sa nasudnong average nga 5.5 porsyento nagpakita nga ang baskug nga pagtubo sa Bohol nagpadayon sa kasaligan nga pagsipa sa tanang sector ilabi na sa mga sector nga may kalambigitan sa turismo sa ma sa panakyanan, accommodation ug mga kan-anan.
Sa taho sa PSA, ang panakyanan ug ang sector sa pamodega mingtubo ngadto sa 20.4 porsyento sa 2023, samtang ang accommodation ug food services mingsulbong ngadto sa 27.9 porsyento, nga nagpatin-aw sa pagka-andam na sa Bohol sa mas daghang turista ug kalihikan sa negosyo.
Sa pagtugyan ngadto sa AIC sa Panglao Airport, ilawom sa 30 ka tuig nga kontrata, ang BPIA niining buwana, usa na sa tulo ka mga airports nga gidumala sa AIC: sama sa Mactan-Cebu International Airport sa Cebu ug Laguindingan International Airport sa Misamis Oriental.
Nakapila na usab ang pagpa-ugmad sa pasilidad sa nahisgutang tugpahanan, nga gipaneguro nga makatampo sa Bohol isip hayag nga tourism economic hub sa Central Visayas.
“Mapasigarbohon kita nga magsuporta sa pangandoy sa lalawigan sa Bohol pinaagi sa transformative infrastructure ecosystems sama sa BPIA,” matud pa ni AIC President ug CEO Cosette V. Canilao, segun sa taho.
Una na nga gikataho nga ang AIC gitakda nga magpatuman sa P4.53 billion investment plan nga maglakip sa pagpalapad pa sa passenger terminal building sa BPIA, pagpahimutang sa nga moderno nga aviation systems, ug pagpanindot sa airside ug landside facilities.
Sulod sa unang duha ka tuig sa pagdumala sa tugpahanan, tumong sa AIC ang pagpadaghan pa nsa kasamtangan nga kapasidad sa airport gikan sa 2 million ngadto na sa 2.5 million ka pasahero matag tuig ug ngadto na sa 3.9 million ka pasahero sa 2030.
Nunot niini ug ubanan sa mga kabag-ohan nga ipatuman sa BPIA, milaum ang Aboitiz Group nga naa sa saktong panahon ug lakang ang Bohol sa Panglao. (PIA Bohol)
