NAGPAHIGAYON sa usa ka mahinungdanong lakang ngadto sa pagpalig-on sa inklusibong kalamboan ug paghatag gahum sa Katawhang Lumad, ang Panggamhanan sa Probinsiya sa Bohol og usa ka komprehensibong workshop sa Pagplano sa Trabaho ug Pinansyal (WFP) alang sa Eskaya Indigenous People’s Development Project niadtong Hunyo 4, 2025. Ang kalihokan gipahigayon sa PPDO Conference Hall.
Ang workshop gitumong sa paghimo ug 12 ka tuig nga Work and Financial Plan (WFP) nga nahiuyon sa nasyonal ug lokal nga mga prayoridad sa kalamboan samtang nagtubag sa mga piho nga panginahanglan ug mga pangandoy sa Eskaya Indigenous Cultural Community.
Nagsilbi usab kini nga capacity-building initiative aron pagsangkap sa mga opisyal sa lokal nga gobyerno ug partner agencies sa mga kahanas sa pag-andam, pag-align, ug pagdumala sa WFPs pinaagi sa participatory, praktikal, ug culturally responsive nga pamaagi.
Si Board Member Elpidio Bonita, amahan sa Provincial Ordinance 2023-013 o Eskaya Code of Bohol, nipadayag sa iyang panghinaot nga hingpit nang mapatuman ang mga plano nga giumol.
Gipasalamatan niya ang tanan alang sa ilang kooperasyon ug gipasiugda ang kamahinungdanon sa padayon nga konsultasyon sa komunidad sa Eskaya sa tibuok proseso sa pagplano ug pagpatuman.
Ang kalihukan gitambungan sa mga mahinungdanong representante gikan sa Probinsiya sa Bohol, mga ahensya sa nasudnong kagamhanan, mga local government units gikan sa mga lungsod sa Duero, Guindulman, ug Pilar, pinuy-anan sa mga komunidad sa Eskaya, ingon man mga miyembro sa Eskaya Federation ug mga representante gikan sa Bohol Island State University (BISU).
Isip ang una ug bugtong geopark sa Pilipinas nga gitudlo sa UNESCO, ang Bohol adunay talagsaong responsibilidad sa pagbalanse sa ekolohikal nga pagpadayon uban sa pagpreserbar sa kultura.
Ang pag-integrate sa Eskaya Development Project ngadto sa long-term provincial planning nagpakita niini nga pasalig sa inklusibo ug malungtarong pagtubo.
Pinaagi sa mga inisyatibo nga sama niini, ang Panggamhanan sa Probinsiya sa Bohol mipamatuod pag-usab sa ilang dedikasyon sa pagsiguro nga walay komunidad nga mabiyaan sa pagtinguha sa inklusibo nga pag-uswag ug malungtarong kalamboan. (RTB)
