SUBAY sa direktiba ni Gobernador Aris Aumentado, gipahigayon sa Bohol Provincial Anti-Monkeypox (Mpox) Task Force ang unang tigom niini, Hunyo 02 didto sa Kapitolyo, aron sa paghipno sa mga lakang kontra Mpox.
Daan nang gipahibalo sa Kapitolyo ubos sa liderato sa Gobernador nga wala pay positibo nga kaso sa Mpox, ug kontrolado niini ang sitwasyon, busa dili angay nga mag-panic o mabalaka bahin niini.
Isip proactive prevention, gipanguluhan ni Provincial Administrator Asteria Caberte ug sa hepe sa Provincial Health Office (PHO) Dr. Fruserma Mary Uy, ang pag-establisar og mekanismo, pagkontrolar sa posibleng pagkatap sa Mpox, sa higayon nga aduna’y kompirmadong kaso sa lalawigan.
Nasayran nga usa sa mga gikatahapang nataptan sa Mpox diin kasamtangang higpit nga giobserbahan, negatibo sa maong makatakod nga sakit.
Si Dr. Uy namahayag nga gipaningkamutan sa Task Force nga mapadali ang resulta sa pag-test sa specimen sa mga suspected cases, sukwahi sa kasamtangang paghuwat niini sulod saw 10-12 ka adlaw gumikan kay ginapadala ang specimen ngadto sa Research Institute for Tropical Medicine (RITM).
Dugang niini, matud ni Uy nga less than 1 percent lamang ang mortality rate ning maong sakit.
Tinguha sa Task Force nga maaprobahan sa Department of Health (DOH), ang plano sa Kagamhanang Probinsyal nga gamiton ang PCR laboratory ug COVID-19 Testing Facility sa lalawigan aron paspas nga masayran ang resulta ug mapahimutang dayon sa Isolation Facility ang pasyente sulod sa 21 ka adlaw kung mag-positibo.
Girekomendar sa Task Force nga sa makumpirmang adunay Mpox, mag-home isolation kini sulod sa 21 ka adlaw o magpahuway sulod sa Isolation Facility sa barangay.
Alang sa mga langyaw, turista o mga kawani sa Pangagamhanan, abli usab nga muserbisyo ang isolation facility sa Old Airport nga adunay pasiunang dose ka mga lawak.
Ang Provincial Administrator mipahinumdum nga palig-onon ang pahimangno sa publiko nga likayan ang skin-to-skin contact, ug ang mga dapit nga daghan ug tawo.
Paspasan usab ang pag-apod-apod og mga reading materials kabahin sa Mpox ngadto sa mga pasahero nga anaa sa pantalan ug airport. Giawhag ang katawhan nga magsul-ob og facemask.
Sa laing bahin gikauyonan sa task force nga anaa sa mga health facilities, mandatory ang pagsul-ob sa facemasks ug gloves.
Andam usab ang hotline number sa Kapitolyo nga 09302513020 sa pagtubag sa mga inquiries sa katawhan nga nakasinati sa mga sintomas sa maong sakit.
Dugang pa, ang mga Mpox updates magagikan sa opisyal nga Facebook page sa Gobernador, sa PHO, sa Provincial Information and Media Office (PIMO), ug ang mga opisyal nga media partners.
Si Gobernador Aris nag-awhag sa tanan nga bisan pa man kung andam ang task force sa ilang responsibilidad, uban sa Local Government Units, sa lungsod ug sa barangay gikinahanglan ang seryoso nga pagtinabangay aron kapanalipdan ang lalawigan batok sa Mpox ug aron mamintinar ang mauswagong ekonomiya sa Bohol.
Gawas sa mga nahisgutan, uban usab sa maong meeting si Board Member Romulo Cepedoza, Dr. Phillip Van Baton, Dr. Nelson Elle, Dr. Greg Sodusta, Dr. Emerson Mateo, ang mga representante sa Philippine Ports Authority, Bureau of Quarantine, CGS Eastern Bohol, DOH, PDRRMO, PHO, PMO, AMHOP, ug Gov. Celestino Gallares Memorial Hospital. (RTB)
