ADUNAY mga gimonitor nga mga lugar ang National Bureau of Investigation (NBI) Central Visayas Office nga possibling gibalayan sa mga online scammers.
Kini maoy gipahibaw ni Atty. Renan Oliva ang Regional Director sa NBI-7 subay sa bag-o lang napuhag nga scam hub sa dakbayan sa Lapu-Lapu, Cebu diin nalambigit ang 29 ka mga Pinoy ug duha ka mga Taiwanese Nationals.
Matod ni Oliva nga ang buhatan wala mohunong sa pagsusi sa mga lugar nga possibli pa nga gilubloban sa mga indibidwal nga padayong namiktima pinaagi sa online platforms.
“Our investigation is continuing after the crackdown of illegal POGO activities in the country as ordered by our president, these activities has shifted from urban cities to areas in the provinces from buildings to residential areas so that is a continuing investigation that we are conducting,” matod ni Oliva sa Hunyo 6, 2025.
Nasayran nga nilanat na sulod sa usa ka tuig ang modus sa mga langyaw diin nagkadaiyang dating sites sama sa Filipino Cupid ug uban pa ang gigamitan og peke nga mga profile accounts.
Nasuta nga aduna kini fake shop accounts nga magpakaaron-ingnon nga namaligya og mga produkto apan walay moabot nga delivery sa nipalit.
Ang maong operasyon gisusi usab sa buhatan kon konektado ba kini sa uban pa’ng scam hubs sa Sugbo.
Padayon nga panawagan ni Oliva sa publiko nga isumbong sa buhatan ang mga makitang kadudahan o ba kaha mga trabaho nga nagtanyag og illegal nga mga paagi.
“We urge the public to be circumspect of transactions being done online, if you are suspicious of any online transaction you can go to our office or any other government offices in verifying if the said transaction is legitimate or not,” matod ni Oliva. (RTB)
