DI gyod matagna ang panahon.
Dihay duha ka manag-kaatbang nga kandidato pagka-mayor, ang usa reelectionist ug ang ika-duha, midagan og balik human mapildi sa miaging piniliay pagka-kongresista.
Sa nagka-duol na ang piniliay, alegre kaayo ang grupo sa kaatbang sa kasamtangan nga mayor kay matod pa dunay giandam nga kwarta alang sa ilang mga botante. Nagpaabot intawon ang ilang mga loyalista. Pero miabot na lang ang kadlawon hangtod sa buntag sa adlaw sa piniliay, wa gyoy miabot.
Naminghoy intawon ang ilang mga gisaaran nga dunay “ayuda” nga moabot. Matod pa sa usa ka leader sa grupo nga na-miga na lang sa pikas grupo kay wa nay mahimo, “bluff” ra diay tong ilang gihimo kay ang tinuod, wa gyod silay kwarta.
Ang ilang gisaligan, matod pa, nga bisan dili sila kahatag, aduna silay kakampi nga pari nga nanghulga nga ipa-preso kadtong mamalit og boto. Matod pa sa pari, kauban niya sa iyang kawsa ang pipila ka mga abogado ug tungod niini, daghan ang nagtuo nga lig-on ang dugukan sa maong pari, duna kini ika-buga og dili huyang ang baroganan.
Pero mitumaw nga stor-bot (storyang botbot) ra diay tong mga gipamulong sa pari kay wa gyod diay abogado nga kaalyado ang maong pari gawas pa sa balita nga bisan pa kon dunay abogado, di gyod pod magpa-tuo ang pari kay ang pari gyod ang magbuot kon unsaon paghimo ang mga dokumento.
Ang resulta, nangamote intawon ang kaatbang sa kasamtangan nga mayor kay kutob lang sa saad ug pulos saad ang iyang mahimo. Nindot unta paminawon ang mga saad kon katuhoan pa ang nagsulti niini.
Ang naka-pait kay dihay mga higayon kaniadto nga naglingkod pa sa munisipyo ang maong kandidato og kon tinuod pa ang iyang gipanulti, gihimo unta niya kini kaniadto pa ug dili kay karon lang. Sa pipila ka tuig nga namunoan ang maong kandidato, wa gyod niya mapalambo ang lungsod, ang iya ra gyod nga panguwag ang napalambo kay nagpuli-puli ra man siya og ka-ipon.
Bagni kaayo siya mosulti panahon sa kampanya nga dili siya mamalit og boto aron modaog pero nakalimot siya nga hilabihan niyang pamalit og boto sa dihang naglingkod pa siya sa munisipyo kaniadto.
Sakit pod ning maigo o ma-unay ra pod ta sa atong batikos.
* * *
Lahi pod ang nahitabo sa laing lungsod.
Mingaw ang kaatbang og matod pa sa mga leader, naluya na ang kandidato pagka-mayor kay nahurot na gyod ang kwarta niini ug wa nay ikahatag nga uwan-uwan sa gabii sa bisperas sa piniliay.
Gi-verify kini sa kaatbang nga kandidato nga maoy gi-suportahan sa kasamtangan nga mayor ug tuod man, nahibaw-an nila nga tinuod gyod nga wa nay gikahatag nga uwan-uwan ang maong kandidato.
Tungod niini, nanguli na lang ang mga leader ug mga tig-bantay sa kaatbang kay sure-ball na ang kadaogan sa kandidato nga gisuportahan sa kasamtangan nga mayor.
Kompyansa na sa kadaogan kay wala kapanghatag ang pikas, matod pa, ug gipasagdan na lang nila hangtod miabot ang kabuntagon sa adlaw sa piniliay.
Wala lang nila mahibaw-i nga diha diay miabot nga “ayuda” gikan sa kandidato pagka-gobernador nga gihatod sa gabii sa bisperas sa piniliay. Tungod kay nanguli na man ang mga nagbantay sa pikas grupo, dali ra nila nahatod sa ilang mga botante ang “ayuda” nga bag-o lang gihatod. Namusil pa gyod sila sa mga botante sa pikas grupo hangtod nabuntag na.
Wa gihapon kini mamatikdi sa kaatbang nga grupo og mao kini ang giingon nga matod pa – nagmata lang og morning – kay wa gyod intawon kalibotan nga diha diay kamangay nga nahitabo.
Dako ang ilang kahikurat sa dihang migawas na ang resulta – gilubong ang kandidato nga gisuportahan sa kasamtangan nga mayor og midaog ang kaatbang nga kandidato.
Di gyod diay ka-kompyansaan ang kamingaw sa pikas grupo kay kon dili mamatikdan dayon, tiklo gyod ang mag-mata lang og morning.
* * *
Lahi sab ang nahitabo sa lain nga mayor.
Sa nagkaduol na ang piniliay, ang duha ra niya ka kaatbang nga mga mayor (3 sila nga mi-kandidato) ang naapil sa pustaanay kay ang duha ra man ang gituhoan nga kusog ug dumadaog.
Wa gyod maapil ang ika-tulo.
Tungod niini, wa na lang kini magdaghan pa og special ops sa gabii sa bisperas sa adlaw sa piniliay kay matod pa, wa na pildi na.
Sa nag-ihap na sa mga boto, wala na siya mag-monitor kay gasakit-sakit lang kuno sa dughan nga makita ang iyang kapildihan.
Imbes mag-monitor sa resulta, didto na lang deretso sa iyang barbero ug nagpatupi na lang ang maong ika-tulo nga kandidato ug wala na pod siya magtagad sa mga text ug calls sa iyang cellphone.
Gipasagdan lang niya ang mga missed calls kay nag-focus na lang siya sa tupi.
Diha pa bitaw mipikpik sa iyang abaga ug sa kusog nga tingog miingon nga — sus dia ra man diay ka mayor, ganiha ra kong pangita nimo.
Kay ngano, tubag sa kandidato.
Susko, ikaw ang midaog og layo kaayo ang biya sa nagsunod nimo, maoy tubag sa nagpikpik sa iyang abaga.
Tinuod ka, daw dili makatuo ang kandidato og mao nga gipakita kini sa unofficial result sa hapit na mahuman nga canvassing.
Ug diha pa siya makahibalo nga midaog diay siya.
Apil sa mga missed calls mao ang tawag sa iyang mga kaatbang nga mipahalipay sa iyang kadaogan.
