KATAW-ANAN gyod ning politika.
Sa unang mga panahon, wa’g tuo ang batikos ni former city mayor Dan Lim batok ni Cong Edgar Chatto, labi na on the issue of Bohol’s water and power to Salcon. Di makao’g iro ang mga putak-putak ni Dan Lim batok kang Chatto.
Pero karon, mora og amigo na sila under Team Duterte kunohay kay adunay tarpaulin nga silang duha kauban sa grupo.
Wa pod ta masayod kon kinsa ang nagpahimo sa maong mga tarpaulin, si Dan Lim ba o si Edgar Chatto basta gipakatap na ang maong mga tarpaulin sa mga lungsod nga sakop sa 1st District.
Ang mensahe – kauban na kunohay sila sa grupo o naghiusa na sila alang sa mga Bol-anon.
Kadtong wa kadungog sa mga putak-putak ni Dan Lim sa una, posible nga motuo. Pero kadtong nakadungog, makatawa na lang seguro.
Ingon ana gyod seguro nang politika.
* * *
Sa pagduaw ni VP Sara sa Tagbilaran sa miaging semana, tam-is pas dugos ang pahiyom ni Dan Lim samtang giisa ni Inday Sara ang iyang kamot, bale pagmatuod nga sila ang mga kaalyado ni Inday Sara sa Bohol.
Buyno, di pod nato mahibaw-an kon nasayod ba si Inday Sara nga ang giindorso ni Dan Lim pagka-kongresista sa 1st District sa Bohol mao si Cong Edgar Chatto nga usa sa mga mipirma sa impeachment complaint batok kang Inday Sara.
Gani, hilabihang tingsi sa mga grupo ni Dan Lim sa dihang gi-mention ni Inday Sara nga sa iyang mga anak wala gyoy bisan usa nga politiko nga maninoy o maninay kay di mahibaw-an kon kanus-a siya traydoran – hilom nga atake sa mga kumare niya sa Bohol nga mipirma sa impeachment complaint nga sila si Cong Vanvan Aumentado ug si Cong Alexie Besas-Tutor.
Pananglit dunay misulti ni Inday Sara niini, ambot kaha kon iisa pa ba ni Inday Sara ang kamot ni Dan Lim.
* * *
Pero daghan ang natingala.
Kon tinud-anay pa nga pag-endorso ang gihimo ni Inday Sara kang Dan Lim ug mga kauban, nganong didto ra man kini gihimo sa “suok” nga lugar sama sa Cogon, nganong wala man sa ubang lugar nga sentro sa mga katawhan aron daghan ang makakita ug makadungog.
Ngano kaha pod nga nag-inusara ra man si Inday Sara sa maong pagbisita ug wala dad-a ang mga PDP senatoriables?
Unsa man kaha to nga okasyon, PDP nga Dumaluan Wing lang kay sila ra man si Dr. Doloreich Dumaluan ang iyang kauban, wala man ang matod pa Provincial Chairman sa PDP-Bohol nga mao ang kasamtangan nga Mayor sa Alicia?
Matod pa sa Mayor sa Alicia, gusto sa mga PDP senatoriables nga adto gyod sa Alicia pagahimoa ang meting de avanci, ug dili sa Tagbilaran. Pero dunay nagsulti nako nga dili kini tinuod kay wala man gani maghimo og formal request ang Alicia Mayor nga adto himoa sa Alicia ang maong kalihokan ug wala pa usab kini mauyoni, labi na gyod sa parte ni Inday Sara.
* * *
Sa meeting nga gihimo sa Garden Cafe, hugot nakong gisugyot nga mas maayo nga anhi sa Tagbilaran pagahimoa ang meting de avanci sama sa gihimo ni PRRD kaniadtong 2016 tungod kay mao kini ang capital, tapokanan sa mga tawo ug nia dinhi ang daghang mga hotels ug restaurants, human nga mipasalig ang PDP Chairman sa Bohol nga segurado na ang pag-anhi sa mga PDP senatoriables apil si Inday Sara.
Apan wala mouyon si Chairman kay gusto niya nga sila nga mga kandidato sa PDP maka-benepisyo pod sa pagbisita ni Inday Sara.
Ang tumoy – wala na madayon ang meting de avanci sa Bohol og napawong ang pasalig ni PDP-Bohol Chairman.
* * *
Laing kataw-anan.
Adunay negosyante nga mapasigarbohon nga misulti nga siya ra ang makadala ni Inday Sara sa Bohol og kon moanhi sa Bohol si Inday Sara, di gyod mahimo nga dili siya pahibaw-on o pakuyogon.
Bisan kinsay maminaw sa maong negosyante, mao gyod na iyang balik-balikon og sulti isip pagmatuod nga suod sila kaayo ni Inday Sara.
Pero sa pagbisita ni Inday Sara sa miaging semana, daghang natingala nga wala man sa kilid ni Inday Sara ang maong negosyante ug sa dihang gipangutana siya kon tinuod ba ang balita nga mobisita si Inday Sara sa Tagbilaran, hugot nga nanghimakak ang negosyante nga dili kini tinuod kay wala man siya tawagi ni Inday Sara.
Susmariosep, nagmata ra man diay siya og morning.
HIlabihang ulawa pod ning manugilon ug magpatuo ta nga kita ray suod ug makadala ni Inday Sara sa Bohol unya himan-himan dili man diay tinuod.
* * *
Dunay kandidato nga bisan iyang mga kauban, dili gyod ganahan nga makig-uban niya, dili kampante kon magkuyog sila ug labi na nga dili ganahan nga modaog ang maong kauban.
Ngano man?
Kay bisan kinsa ra may birahan – apil ang iyang mga kauban kon mag-diskurso na ang maong kandidato.
Unsay may birada diay?
Dili kuno siya mamalit og boto, buot ipasabot, wala siyay hiphip, way kwarta isukip sa iyang sample ballot ug dili siya manghatag og kwarta sa mga botante. Pero unsaon man na nga ang iyang mga kauban kay mamalit man og boto, duna may special ops?
Unya ang nakapait pa gyod, nahadlok kaayo ang iyang mga kauban sa partido nga makabalo unya ang maong kandidato sa ilang special ops kay bason og banatan sila sa pisbok bahin niini.
* * *
Mobotar na kang Dan Lim pagka-gobernador human kini gi-endorso ni Inday Sara?
Mao kini ang panguta ngadto sa usa ka vlogger.
Simbako, maoy deretsong tubag.
Kon nakaila o nahibaw pa lang si Inday Sara ni Dan Lim, ambot lang, dugang pa sa vlogger.
Amen.
* * *
Happy Mother’s Day sa tanang mothers.
