GIDEKLARAR sa kagamhanan nga “Buwan ng Kalutong Pilipino” o “Filipino Food Month” ang buwan sa Abril sumala sa batang-ong Bokal sa tersero distrito DJ Balite.
Sigon ni BM Balite nga ubos sa Proclamation No. 469 nga gilagdaan ni kanhi Presidente Rodrigo Duterte, gimanduan ang Department of Agriculture (DA) ug ang National Commission for Culture and the Arts (NCCA) nga pangunahan ang tinuig nga selebrasyon alang sa “Filipino Food Month”.
Gipasabot sa bokal nga nakalatid sa proklamasyon nga ubos sa 1987 Constitution, kinahanglang siguradohon sa gobyerno nga mahatagan og kamahinungdanon ug ma-preserbar ang kultura sa nasod.
Giingon usab ni Balite nga angay hatagan og pag-ila ang ‘culinary tradition’ sa Pilipinas ug angay mahatagan og promosyon aron masigurong mapasa kini sa sunod nga henerasyon.
Ubos sa National Culture Heritage Act of 2009, gi-ila ang ‘culinary tradition’ isip parte sa cultural heritage sa nasod, dugang ni BM Balite. (RTB)
