PORMAL nang gi-endorso sa PDP-Laban si ‘Tigpanalipod’ Atty. Jordan Matig-a Pizarras pagka kongresista sa Distrito Uno sa Bohol.
Bag-ohay lang nipahigayon og tigum ang PDP-Laban Bohol sa usa ka inilang restaurant sa Dakbayan kon diin gipangunahan kini ni Alicia Mayor Victoriano ‘Dong-T’ Torres III ug gisuportahan sa mga ‘pro-Duterte’ support groups.
Si Mayor Torres III na lamang ang nagpabiling ‘incumbent mayor’ sa Visayas nga naa sa PDP-Laban.
Ang maong tigum gipahigayon alang sa preparasyon nga himuon sa campaign sortie sa PDP-Laban senatoriables karong buwana.
Giklaro ni Atty. Pizarras nga kon tugtan sa kahitas-an nga mahimong kongresista sa Distrito Uno, usa siya sa mga magbabalaud nga mo-protektar kang Bise Presidente Sara Duterte.
Sa iyang mga nangaging pamahayag, ang giilang ‘Top Appellate Lawyer’ sa nasud niasoy nga ang pagdakop kang kanhi presidente Digong Duterte. Kini gumikan kay walay jurisdiction ang International Criminal Court (ICC) sa kaso ni Duterte. Ang Pilipinas ni-withdraw isip myembro sa ICC niadtong 2019.
Si Bise Presidente Sara Duterte ang ‘frontrunner’ pagka-presidente sa 2028.
Tulo ka Partido lamang ang wala nagpasilong sa Bagong Pilipinas coalition; Aksyon Demokratiko nga maoy naghatag sa Certificate of Nomination (CONA) ni Atty. Pizarras, PDP-Laban nga nag-endorso niya pagka kongresista sa Distrito Uno sa Bohol ug ang Liberal Party. (Kahlil Lester O. Camba)
