GIHANDUM sa Kapitolyo pinaagi sa Center for Culture and Arts Development (CCAD), ang ika-83 nga Adlaw sa Kaisug niadtong Abril 9, 2025, subay sa tibuok nasod nga pagsaulog sa Philippine Veterans Week.
Gipahigayon sa Provincial Capitol Grounds, ang seremonyas naghatag pasidungog sa kabayanihan sa mga Pilipinong beterano ug lokal nga mga bayani kansang mga sakripisyo nagpadayon sa paghulma sa kaugmaon sa nasud.
Ang tema karong tuiga, “Kabayanihan ng Beterano: Sandigan ng Kaunlaran ng Bagong Pilipinas,” nagpasiugda sa mahinungdanong tahas sa mga beterano sa pagtukod ug kalamboan sa nasod.
Ang paghandum gibuksan pinaagi sa pag-recitation sa Pledge of Allegiance nga gipangulohan sa Boy Scouts of the Philippines, gisundan sa usa ka solemne nga wreath-laying ceremony nga giduyogan sa mga importanteng provincial ug city leaders, ahensya, ug civic organizations.
Lakip sa mga wreath-layers mao sila si Gobernador Aris Aumentado nga girepresentahan ni Provincial Legal Officer Atty. Handel Lagunay, mga representante gikan sa Department of Education–Bohol ug Tagbilaran City; Tagbilaran City Mayor Jane Censoria-Yap, nga girepresentahan ni Ondoy Borja; Si Kongresista Edgar Chatto, nga girepresentahan ni Atty. Abel Damalerio; Congresswoman Vanessa Aumentado, girepresentahan ni JP Maslog; ug Congresswoman Alexie Besas-Tutor, nga girepresentahan ni Katherine Inte. Ang ubang mga partisipante naglakip sa Philippine Veterans Affairs Office, Bureau of Fire Protection, Armed Forces of the Philippines, Bureau of Jail Management and Penology, Philippine Coast Guard, Philippine National Police, Veterans Federation of the Philippines, Girl Scouts of the Philippines, PMI ROTC, ug Provincial Administrator Asteria Caberte.
Ang 702nd Community Defense Center sa 7th Regional Defense Group, ARESCOM, nihatag og 21-gun salute, samtang ang Provincial Capitol Band nipasundayag og Taps.
Dugang nga mga tribute sa bulak ang gitanyag sa mga beterano, estudyante, ug miyembro sa Sons and Daughters Association Incorporated.
Ang program proper gisundan sa Ceremonial Hall sa Bag-ong Kapitolyo sa Probinsiya, gisugdan sa Kagitingan Prayer of Unity nga gipangulohan sa mga presidente sa Supreme Student Council.
Giabiabi ni bise gobernador Tita Baja ang mga nanambong ug giila ang kamahinungdanon sa paghinumdom sa kasaysayan, ingon man ang kontribusyon sa kababayen-an sa lainlaing mga industriya isip mga bayani sa modernong panahon.
Misunod ang usa ka kultural nga presentasyon sa WinArts Anatomy Dance Company, nga nagdugang usa ka dinamikong tribute pinaagi sa paglihok ug musika.
Makapadasig nga mga mensahe ang gihatag ni Perlina Alo, Officer-in-Charge sa National Historical Commission of the Philippines–Bohol, ug Jerome Gonzales, Provincial Director sa Department of the Interior and Local Government–Bohol. Ang duha nihatag og gibug-aton sa kabililhon sa kagawasan nga natagamtaman karon ug miila sa kaisog sa mga nakig-away niini.
Ang mensahe ni Gobernador Aumentado gipadangat ni Atty. Lagunay, nagpasalamat sa tanang nalambigit sa paghimo sa maong kalihukan nga makahuluganon. Gipasiugda sa Gobernador ang kaisog sa mga beterano, nga nagtawag sa ilang mga istorya sa kinabuhi nga “dili mahikap nga mga bahandi” nga kinahanglan magdasig sa komunidad
“Kini maoy higayon kanato nga hinumdoman ang gipakitang kaisog sa tanang beterano nga nitanyag sa ilang tagsa-tagsa ka mga kinabuhi aron maprotektahan ang kagawasan sa nasud Pilipinas ug matagamtaman nato ang tinud-anay nga kalinaw ug kagawasan ubos sa pagdumala sa usa ka gobyerno nga gipangulohan sa mga Pilipino,”.
“Dili nato sayangon ang higayon nga kita makakat-on gikan sa ilang mga kaagi, diin madungog nato ang ilang mga istorya sa pakigbisog nga makapadasig kanato nga dili gayud magpapildi sa mga hagit sa kinabuhi. Ang kaalam, kahanas, ug kasinatian sa mga Bol-anong beterano maoy matawag nato nga ‘intangible treasures’ nga angayan natong amumahan ug gamiton sa pagpalambo sa atong katilingban,”,
“Isip usa ka katawhang Bol-anon, ipakita nato ang tinudanay nga pagpasalamat sa tanang mga beterano ug mga bayani, kaniadto ug karon, nga nagsilbing pundasyon sa padayon natong pagmugna og usa ka probinsya nga galantaw sa usa ka mas hayag nga kaugmaon,” panawagan ni Aumentado sa tanan. (RTB)
