PORMAL nang gi-endorso nila PDP Laban senatorial aspirants Atty. Jimmy Bondoc ug SAGIP Partylist Cong. Rodante Marcoleta ang kandidatura pagka-mayor ni Talibon #2 Councilor / Team Way Biyaay standard-bearer JP Cutarra Flores ug mga kaubanan didto sa Tanghaligue Covered Court.
Sila Bondoc ug Marcoleta ang pipila sa mga senatoriable nga tinuboy ni kanhi Pres. Rody Duterte. Si kanhi Congressman Tony Bravo ang ni-representar kang Marcoleta sa maong proclamation rally sa Team Way Biyaay.
Ang ilang mga kandidato pagkakonsehal naglakip nila kanhi bise mayor Epifanio Quimson, kanhi konsehal Junette Loma, Michael Abesia, Joshua Basalo, Rocel Cutarra, Lord Leo Aventurado, Carina Cajes ug Corter Palange.
Kauban usab nila Bondoc mao si AHON Mahirap 1st nominee Wilbert Tolentino, 2nd nominee ug kasamtangang mayor sa Pateros nga si Atty. Ike Ponce ug 3rd nominee Paolo Martelino.
Lakip sa mga programa sa grupo mao ang paghatag og tabang sa mga mananagat sa kailsahan kon panahon sa habagat, de kalidad nga Healthcare alang sa tanan ug uban pang mga ‘pro-poor programs’ nga mopa-usbaw sa kalidad sa kinabuhi sa katawhan.
Sa pamahayag ni Atty. Bondoc, giawhag niya ang katawhan ug uban pang mga Bol-anon sa pagsuporta sa tanang mga kandidato sa PDP-Laban slate karong 2025 nga piniliay. Kini arun makakuha og igong boto arun dili ma-impeach si Bise Presidente Sara Duterte.
9 sa 24 ka mga senador ang gikinahanglan arun dili ma-impeach atong bise presidente.
Dugang pa niya, gikinahanglan nga ma-edukar kita sa mga hiwi nga dinalhan sa kasamtangang administrasyon karon ilabi na sa paggamit sa pundo sa gobyerno.
Kahinumduman nga usa si Atty. Bondoc, kanhi House Speaker /Davao Del Norte 1st district Cong. Pantaleon ‘Bebot’ Alvarez ug uban pa sa mga nikiha kang House Speaker Martin Romualdez.
“Ang parat-parat, apod-apod mo-serbisyo pud”, suma pa ni Joshua Basalo, kinsa usa sa mga kandidato pagka-konsehal.
“Daghang Salamat! sa tanang nitabang sa kampanya sa atong ‘Kawsa sa mga Kabus’ – Team Way Biyaay, materyal, pinansyal, moral, emotional ug spiritual support”, dugang pa ni JP Flores.
“Dili mo nako matagsa2x, daghang kaayong Salamat, alang kini kanatong tanan labi na sa atong mga kaigsoonang kabus.” (Kahlil Lester O. Camba)
