TULO ka 62-Footer Commercial Vessel ang giturn-over ni Gobernador Aris Aumentado uban sa Bureau of Fisheries and Aquatic Resources (BFAR) nga girepresentahan sa BFAR-Bohol Provincial Fishery Office Head Candido Samijon, didto sa Daorong Public Beach, Danao, Panglao, Marso 26.
Si Samijon nagkanayon nga ang maong tulo ka panagatan sa Kagamhanang Probinsyal kabahin sa gipanghatag sa BFAR ngadto sa tibuok rehiyon, diin usa niini nadawat sa Negros ug duha ang nadawat sa Cebu.
Gawas sa tulo nga nadawat sa Bohol, posible nga aduna pa’y laing upat niini nga muabot sa Bohol, diin kining tanan gumikan sa pagpaningkamot ni Gobernador Aris, pagpakighinabi ngadto sa Nasudnong Pangagamhanan ug sa BFAR Central Office.
Mapasalamaton si Duero Mayor Al Taculad sa talagsaon nga suporta sa Gobernador ngadto sa Duero, isip midawat sa 10 Milyones nga panagatan diin didto gipahimo sa Danao, Cebu.
Ang asosasyon sa mga mananagat sa Panglao ug Guindulman, benepisyaryo sa 8 Milyones nga panagatan diin gibuhat kini didto sa Navotas, Central Luzon, ug adunay kapasidad nga siyam ka tonelada. Kumpleto kini sa kahimanan apil ang 6 ka pakura (small catcher boat), generator, ug ang vessel monitoring system (VMS).
Si kanhi BFAR VII Regional Director ug karon consultant Alfeo Piloton mipasabot nga pinaagi sa VMS sa maong tuna handline (hook and line) nga mga panagatan, masayran kung hain ang lokasyon niini sa paglawig, ang gikusgon sa dagan ug ang partikular nga aktibidadis sa maong panagatan.
Tumong niini nga makapanagat sa Eastern Pacific Seaboard, sa Sulu Sea, Camotes o sa Camiguin Island.
Kahinumduman nga subay sa balaod, mga gagmay’ng mananagat lamang ang mahimo nga managat sulod sa 15 meters municipal waters.
Ang pakuha nga isda sulod sa maong katubigan dili paigo nga isuplay sa kapin sa milyones nga mga Bol-anon ug turista sa lalawigan. Usa kini sa posibleng rason sa pag-abuso sa ubang mamaligyaay og isda, nga nagpamahal sa ilang baligya.
Kini ang hinungdan nga seryoso ang Gobernador nga maka-angkon ang Bohol og mga dagkong panagatan aron makabaton og abunda nga suplay sa isda ang lalawigan.
Dako ang pagsalig sa Gobernador nga pinaagi ning maong proyekto, matubag ang problema sa mahal nga isda, ug magdugang kini sa panginabuhian sa katawhan.
“Mao gyod ni ang hagit nga kanunay natong giatubang. Nabungol na mi sa mga katawhan, sigeg syagit arang mahala sa isda sa atong lalawigan, pero unsaon man nga di man kami ang mga mananagat.Naminaw kita sa ilang mga yangongo ug mi-connect kita sa mga mananagat ug mga hingtungdang buhatan, aron sila makatubag sa yangongo sa katawhan,,” matud sa Gobernador.
Giawhag sa Gobernador ang mga benepisyaryo nga mga mananagat nga muduol sa pangagamhanan kung unsa man ang mga problema sa ilang pagsugod, kay andam kini sa pagtabang. Pag-awhag sa Gobernador, pahimuslan ang oportunidad nga gisaligan sa Gobyerno ang mga asosasyon.
Pagdugang ni Aumentado, “Nangandoy mi ug nangindahay mi nga ma-successful ni aron ato kining palapdan ngadto sa ubang coastal areas, aron sila makatagamtam usab sa serbisyo ug programa sa Provincial Government uban ang suporta sa BFAR.”
Sa laing bahin, ang Kapitan ug mekanista nga mudala sa maong commercial vessel, mipailalom og mga pagbansay didto sa Cavite. Ubos sa pagdumala sa PCDO,, ang mga asosasyon kinahanglan mupailalom usab sa mga pagbansay kabahin sa financial management. Mahinungdanon kini nga magkat-on ang kapunungan pagdumala sa ilang kita aron mulahutay ang programa ug ma replika kini pinaagi sa ilang kaugalingon nga abot. Gisangkapan usab kini sa gikinahanglan nga lisensya ug uban pang mga papel aron makapanagat nga luwas ug walay kabilinggan.
Si Aumentado mipahibalo nga andam ang Kagamhanang Probinsyal pagsuporta sa bugas ug gasolina ngadto sa mga hingtungdan, atol sa unang tulo ka bulan nga paglawig sa pagpanagat aron aduna usab makaon ang pamilya nga mabiyaan sulod sa pipila ka adlaw nga pagpanagat.
Ang paglusad ug seremonya sa pagtugyan sa maong mga panagat gisaksihan sa buhatan sa OPA, PCDO, mga representante sa lungsod sa Panglao, Duero, Guindulman, mga empleyado sa BFAR ug mga asosasyon nga benepisyaryo sama sa Fisherfolks Federation of Panglao nga gipanguluhan ni Crispin Horcasitas, Guindulman Federation of Fisherfolks Association and Cooperative nga gipanguluhan ni Gil Moran ug Madua Norte Fishermen Association nga gipanguluhan ni Rodel Mar Besagas. (RTB)
