GITAKDA sa Bohol nga saulogon ang dato nga theatrical heritage sa probinsiya ug ibutang ang Bohol isip usa ka buhi nga hub alang sa teatro ug sa performing arts.
Ang Theater Arts Committee sa Bohol Arts and Cultural Heritage (BACH) Council sa pakigtambayayong sa Kasing Sining ug gisuportahan sa Provincial Government sa Bohol pinaagi sa Center for Culture and Arts Development (CCAD) ug Goethe-Institut Philippines, nag-organisar sa Bohol Theater Festival 2025: Hinabo ug Hitabo nga gikatakda karong Abril 1-3 sa Bohol Cultural Center.
Matod ni Engr. Jerrey Aguilar, festival director, ang kalihokan magtigom sa mga grupo sa teatro sa eskwelahan, simbahan ug komunidad sa tibuok Bohol alang sa mga pasundayag, workshop ug mga diskusyon kauban ang mga pasundayag gikan sa nasyonal ug internasyonal nga mga practitioner.
Ipahigayon ang paglusad sa World Theater Day, karong Marso 27, 2025, sa National Museum of the Philippines-Bohol.
Mahitabo usab nianang adlawa ang mga ritwal sa pasundayag sa mensahe sa World Theater Day sa nagkalain-laing dapit sama sa Dao Bus Terminal, Dao Public Market, Island City Mall, Bohol Quality Mall, Holy Name University, Bohol Island State University, University of Bohol ug Plaza Rizal sa Tagbilaran City.
Samtang, ang mga pop up nga pasundayag sa mga pampublikong lugar gieskedyul sa Marso 28-31, nga nagdala sa teatro nga mas duol sa komunidad ug nag-apil sa mga tumatan-aw lapas sa tradisyonal nga mga lugar.
Ang 3 ka adlaw nga main event magpakita sa mga orihinal nga pasundayag ug materyales sa mga Boholano; mga diskusyon bahin sa ebolusyon sa talan-awon sa teatro sa Bohol, labing maayong gawi sa pasundayag ug produksiyon, ug ang kamahinungdanon sa teatro sa pagpalambo sa komunidad; ug interactive workshop sa paghimo ug direksyon sa teatro.
Ang festival nagtumong sa paghatag og plataporma alang sa mga lokal nga grupo sa teatro, eskwelahan ug mga artista sa komunidad sa pagpresentar sa ilang mga istorya. (RTB)
