NUNOT niining mga nanggawas sa social media nga mga post bahin sa mga sundalo ug mga polis nga nag-ingong wala na sila ganahi sa gobiyerno karon maong nang-resign sila sa serbisyo, ang Visayas Command (VisCom) mihimakak niini.
Ang tigpamaba sa kampo nga si Lieutenant Colonel Israel Galorio miingon nga wala sila’y mga sakop nga nang-resign tungod sa nahitabo kang kanhi presidente Rodrigo Duterte nga gidakop ug toa na sa International Criminal Court tungod sa kasong crime against humanity.
Si Galorio miingon nga wala silay nadawat nga reports gikan sa ilang nagkalain-laing unit sa ubos nga dunay unusual filing of resignation sa ilang mga sundalo.
Gipasalig ni Galorio nga ang Visayas Command isip miyembro sa Armed Forces of the Philippines (AFP) nagpabiling professional ug non-partisan organization nga nagtamod sa ilang constitutional mandate.
“We uphold the rule of law and adhere to the chain of command. Our personnel remain focused to our sworn duty of ensuring the safety and security of our people here in the Visayas region,” sigon pa ni Galorio.
Samtang ang Bohol Police Provincial Office (BPPO) mibutyag nga wala sila’y na-monitor nga mga personnel nga ni-resign o kaha nagplano nga mo resign sa serbisyo tungod sa nahitabo ni Duterte.
Matud sa BPPO nga dili angay mabalaka kay nagpabilin silang lig-on ug dedicated sa tahas nga gisangon kanila.
Gipahibawo sab sa BPPO nga balik sa normal ang alert status gikan sa pagdeklarar og heightened alert ang PNP tungod sa pagdakop sa kanhi presidente.
Magpadayon sila sa monitoring sa mga posibleng kalihukan nga buhaton sa anti ug pro Duterte aron pabiling malinawon ug walay kasamok nga mahitabo sa lalawigan sa Bohol tungod ani. (RTB)
