OTSENTA PORSYENTO nang andam ang Commission on Elections (COMELEC) sa Bohol alang sa Mayo 9, 2022 nga piniliay.
Kini ang nasayran ning pamantalaan gikan ni Atty. Eddie Aba, kinsa maoy kasamtangan nga pangulo sa buhatan dinhi sa lalawigan.
Sigon ni Aba nga duna nay nangabot nga vote counting machines (VCM) ug gikatakdang ipanghatod ngadto sa clustered precincts alang sa final testing ug sealing sa mga balota.
Dugang niini nga ang Mayo 9 nga eleksyon nagpadayon bisan pa sa potensyal nga pagdagsang sa COVID-19 ug dili nila i-postpone ang eleksyon bisan unsa pa ang mahitabo.
“We have already prepared for any eventualities. We have the supplies ready. We have already trained all our election workers,” sigon niya.
Gipasabot ni Aba nga ang poll body adunay mga contingencies sa higayon nga motaas ang kaso sa COVID-19.
Ang Department of Health bag-o lang nipasidaan nga ang kaso sa COVID-19 mahimong moigo sa nasod sa tunga-tunga sa Mayo kung ang publiko dili motuman sa minimum nga public health standards.
Gidugang usab ni Aba nga dili na makabotar ang mga pasyente sa COVID-19 facility ug isolation tungod kay ang mga balota dili madala sa isolation facility.
Dugang pa niya nga babag usab ang kasamtangang Rep. Act 11332 ug Inter-Agency Task Force (IATF) policy nga nagdili sa paggawas sa balay o pasilidad sa mga kumpirmadong adunay COVID-19.
Samtang, ang mga monitor nga adunay mga sintomas apan wala pa kumpirmado nga adunay COVID-19, ug kadtong wala sa mga pasilidad sa isolation, mahimo pa nga makaboto. (RTB)
